2025 жылғы желтоқсанда «Даму» кәсіпкерлікті дамыту қоры іске қосқан шағын бизнесті қолдаудың «Іскер аймақ» бірыңғай бағдарламасы 21 млрд теңгеден астам сомаға 300-ден астам жобаны мақұлдады, деп хабарлайды infohub.kz сайты.
2026 жылы қаржыландыру көлемін 20 есеге жуық ұлғайтып, 400 млрд теңгеге жеткізу жоспарлануда, бұл 5 мыңға жуық жобаны қолдауға мүмкіндік береді.
Бағдарлама микро және шағын бизнеске, оның ішінде ауылдық жерлер мен монокалалардағы кәсіпкерлерге бағытталған. Жобаның басты ерекшелігі – өңірлік тәсіл: несиелеудің басым бағыттарын әкімдіктер «Атамекен» Ұлттық кәсіпкерлер палатасымен бірлесіп, әр облыс экономикасының ерекшелігін ескере отырып айқындайды.
Қордың мәліметінше, бағдарлама әртүрлі салалардағы жобаларды қолдаған. Мысалы, Жамбыл облысында қаржыландыруды 20 жылдан астам уақыт бойы қой терісін өңдеп, үлбір бұйымдарын шығарып келе жатқан компания алды. Кәсіпорын жыл сайын шамамен 46 мың теріні өңдейді, ҚТЖ, ІІМ және Қорғаныс министрлігі үшін 20 мыңға жуық үлбір бұйымын шығарады, сондай-ақ өнімін Ресей мен Өзбекстанға экспорттайды.
Қызылорда облысында жеке кәсіпкер шикі күріш сатып алуға 110 млн теңге тартты. Несие 22% мөлшерлемемен берілген, оның 8,8 пайыздық тармағын мемлекет субсидиялайды, сондықтан кәсіпкер үшін түпкілікті мөлшерлеме жылдық 13,2% құрайды. Кәсіпорын тәулігіне 150 тоннаға дейін күріш өңдейді, өнімін Қырғызстанға, Ресейге және Ауғанстанға экспорттайды.
Солтүстік Қазақстан облысында медициналық жабдық шығарушы кәсіпорын қосалқы бөлшектер сатып алу үшін үш жыл мерзімге 100 млн теңге несие алды. Бұл өнім шығару көлемін жылына 5 мыңнан 10 мың данаға дейін ұлғайтуға және бес жаңа жұмыс орнын ашуға мүмкіндік береді.