Италиялық полицейлер Эквадордан жеткізілген банан салынған контейнерден 770 келіге жуық кокаинді тауып, тәркіледі. Тергеушілердің бағалауынша, қара нарықтағы бұл партияның құны 250 миллион еуроға, яғни шамамен 290 миллион АҚШ долларына жетуі мүмкін, деп хабарлайды infohub.kz.
Есірткінің ірі партиясы Вадо-Лигуре портынан табылды. Тексеру кезінде Италия қаржы полициясының қызметкерлері банан салынған тоңазытқыш контейнердің ішінен мұқият жасырылған 650 бума затты анықтады.
Жедел сараптама алынған заттың жоғары тазалықтағы кокаин екенін растады. Билік өкілдерінің мәліметінше, бұл операция осы портта соңғы жылдары жүргізілген есірткіге қарсы ең ірі шаралардың бірі болды.
Тергеушілердің айтуынша, контейнер Оңтүстік Америка мен Италия арасындағы сауда бағыттарын талдау нәтижесінде анықталған. Вадо-Лигуре порты Еуропаға тауар жеткізудің маңызды нүктелерінің бірі саналады және халықаралық есірткі картельдерінің үнемі назарында.
Полиция мұндай операциялар халықаралық есірткі саудасына қарсы ауқымды күрестің бір бөлігі екенін және еуропалық елдерге тыйым салынған заттарды жеткізуге тосқауыл қоюға бағытталғанын мәлімдеді.