Өнер саласындағы қылмыстармен күресетін карабинерлердің арнайы бөлімшесі наурыз айында жеке мұражайдан ұрланған ұлы импрессионистердің үш картинасын сәтті тауып алды, деп хабарлайды infohub.kz.
Шедеврлер 22 наурызда Magnani Rocca қорының жеке мұражайына жасалған тонау кезінде ұрланған болатын. Қылмыскерлер бұрын ұрланған тракторды пайдаланып, берік қақпаны бұзып, вилла аумағына кірген. Дабыл қосылған соң, олар бақ арқылы қашып үлгерген. Асығыстықтан ұрылар Ренуардың тағы бір құнды картинасын — «Каньдағы пейзажды» орнында тастап кеткен.
Табылған шедеврлердің арасында Пьер Огюст Ренуардың «Балықтар», Анри Матисстің «Террасадағы одалиска» және Поль Сезанннің «Шиелі натюрморт» картиналары бар. Үш туындының жалпы құны 10 миллион доллардан асады. Ұрланған жиынтықтағы ең құнды туынды — Сезанннің натюрморты, оның құны 7 миллион долларға бағаланып отыр. Бұл суретшінің жемістерден тек шие бейнеленген өте сирек кездесетін жұмысы.
Италия құқық қорғау органдары картиналарды іздеу бойынша арнайы операцияның мәліметтерін әзірге жариялап жатқан жоқ. Дегенмен, резонанстық қылмысты тергеу аясында Молдованың тоғыз азаматы қамауға алынды. Қазір олардың барлығы тергеу аяқталғанша қамауда отыр. Карабинерлер өкілдері өнер туындыларын алуға қатысқан барлық қызметкерлерге үлкен алғысын білдірді.