Жапония Ресей президенті Владимир Путиннің даулы аралдарға сапарына «қатты наразылық» білдіретінін мәлімдеді. Ресей мемлекеттік БАҚ-тың бейсенбідегі хабарлауынша, Путин Итуруп аралына барған. Бұл аралды Жапония Эторофу деп атайды және ол Ресей мен Жапония дауласып жүрген Курил тізбегіндегі төрт аралдың бірі.
Жапонияның сыртқы істер министрі Тосимицу Мотэги аралдар «тарихи тұрғыдан да, халықаралық құқық тұрғысынан да Жапонияның ажырамас аумағы екенін, сондықтан Жапония үкіметі бұл сапарға қатты наразылық білдіретінін» айтты. Екі ел ондаған жылдар бойы Курил аралдарына қатысты дауласып келеді. Дәл осы дау Мәскеу мен Токионың Екінші дүниежүзілік соғыстан кейін бітімгершілік келісімге қол қоюына кедергі болды.
Курил аралдары Жапонияның солтүстігіндегі Хоккайдо мен Ресейдің Камчатка түбегінің арасында орналасқан. Ең оңтүстіктегі төрт аралды Жапония өз аумағы деп санайды және оларды «Солтүстік аумақтар» деп атайды. Бұл аралдарды Ресей басқарады. Екінші дүниежүзілік соғыстың соңында Кеңес Одағы аралдарды өзіне қосып алып, 17 мыңға жуық жапон тұрғынын көшіріп жіберді.
Ресей мемлекеттік БАҚ-тың хабарлауынша, бейсенбідегі сапары кезінде Путин балық уылдырығынан дәм татып, арал тұрғындарымен сөйлескен. Аралдар Ресейдің әскери операциялары үшін стратегиялық маңызға ие, Итуруп аймақтағы негізгі әскери әуе базасы ретінде пайдаланылады. Өткен айда Қытай мен Ресейдің әскери кемелері бірлескен патрульдеу кезінде Курил аралдарындағы бұғаз арқылы өткен еді. Сондай-ақ, Ресей өткен жылы аралдар маңында әскери оқу-жаттығулар өткізіп, Жапонияның айыптауына ұшыраған.