АҚШ-тың бұрынғы президенті Джо Байден метастазды қуық асты безінің қатерлі ісігінің агрессивті түріне ем қабылдау салдарынан қатты әлсіреген. Сонымен бірге терапия оң нәтиже беріп отыр. Бұл туралы саясаткердің айналасындағы дереккөздерге сілтеме жасаған The Washington Post басылымы хабарлайды, деп жазады infohub.kz.
The Washington Post басылымының дерегінше, қазір 83 жастағы Байденнің өмірі негізінен медициналық процедуралардың айналасында өтуде. Ақ үйдің бұрынғы басшысы отбасы, жақын достары және бұрынғы көмекшілерінің ортасында уақыт өткізіп, қоғамдық іс-шараларда сирек көрінеді.
Газеттің сұхбаттастары емдеу нәтиже беріп жатқан сияқты екенін, алайда аурудың өзі мен терапияның жанама әсерлері экс-президенттің физикалық күйіне айтарлықтай әсер еткенін атап өтеді.
The Washington Post сондай-ақ денсаулық проблемалары Байденнің бірқатар жоспарларының жүзеге асуын қиындатқанын жазады. Атап айтқанда, Делавэр штатында президенттік кітапхана құруға қаржы жинау қиынға соғуда, сондай-ақ 17 қарашаға жоспарланған оның естелік кітабын қолдау туры күмән тудыруда.
Байденнің диагнозы туралы былтыр мамыр айында белгілі болды. Сонда оның баспасөз қызметі бұрынғы президентте сүйек тініне метастаз берген қуық асты безінің қатерлі ісігінің агрессивті түрі анықталғанын хабарлады.
Кейін Байден елдегі жетекші мамандардың бірінің бақылауымен емдеуге кіріскенін және дәрігерлерден қолайлы болжам алғанын айтты. Сондай-ақ өткен айда оған терідегі қатерлі ісік жасушаларын алып тастау операциясы жасалды.
The Washington Post атап өткендей, метастазды қуық асты безінің қатерлі ісігі емделмейтін ауру болып саналады, алайда заманауи терапия әдістері оның дамуын бәсеңдетуге және пациенттердің өмір сүру сапасын жақсартуға мүмкіндік береді.