Қазақстанда саудаға 30-дан астам лот шығарылды, оның ішінде «Тұлпар» ЖШС-нің үлесі, элиталық пәтерлер және жалпы құны 736 млн теңгеден асатын зергерлік бұйымдар мен сағаттар бар, деп хабарлайды infohub.kz сайты.
Сауда туралы ақпарат Қайтарылған активтерді басқару компаниясының сайтында орналастырылған. Лоттар мемлекеттік мүлік тізілімінің sauda.e-qazyna.kz веб-порталында қолжетімді.
Лоттар арасында — «Тұлпар» ЖШС-нің 100% жарғылық капиталдағы үлесі, бастапқы құны 991 469 139 теңге. Кәсіпорын Алматыда орналасқан, қызметкерлер саны — 6 адам.
Сондай-ақ саудаға зергерлік бұйымдар мен сағаттар шығарылды — барлығы 32 лот. Олардың жалпы бастапқы бағасы 736 049 849 теңгені құрайды.
Бұдан басқа, Астанадағы үш пәтер қайтадан сатылымға қойылды. Оның бірі «Париж кварталы» тұрғын үй кешенінде орналасқан, ауданы 93,6 шаршы метр, құны — 112 926 585 теңге. Екінші пәтер — сол кешендегі екі деңгейлі пәтер, ауданы 309,5 шаршы метр, бастапқы бағасы — 363 244 554 теңге. Үшінші пәтер «Green Village» тұрғын үй кешенінде орналасқан, ауданы — 231,8 шаршы метр, бағасы — 214 016 394 теңге.
Сауда-саттық 2, 27 және 28 тамызда өтеді. Еске салайық, бұған дейін Астанада ауданы 350 шаршы метрден асатын коттедж 353 млн теңгеге саудада сатылған болатын. Бұл нысан да қайтарылған активтер қатарында еді.