Канадалық Porter Airlines әуекомпаниясы Ванкувер аралындағы Викториядан Торонтоға ұшатын рейсін баланың қауіпсіздік белдігін тақпауына байланысты тоқтатты. Бұл туралы infohub.kz сайты хабарлайды.
6 тамыздағы рейс ұшу-қону жолағына таксилеп бара жатқанда, бала орындықта тұрып алған. Ересек адам мен экипаждың бірнеше әрекетіне қарамастан, баланы отырғызу мүмкін болмағандықтан, экипаж терминалға қайтып оралып, екі жолаушыны ұшақтан түсіруге шешім қабылдаған. Әуекомпанияның мәліметінше, мұндай қауіпті жағдайда ұшақ ұша алмайды.
Әуекомпания өкілі Брэд Цицеро Canadian Broadcasting Corporation (CBC) телеарнасына берген сұхбатында, барлық жолаушылар ұшақтан түсуге мәжбүр болғанын, себебі тек бала мен ата-анасын түсіріп, құжаттарды қайта ресімдеуге кеткен уақыт ұшақтың 12:30-да жабылатын әуежайға дейін ұшып кетуіне мүмкіндік бермегенін айтты. Ол басқа жолаушыларға келтірілген қолайсыздық үшін кешірім сұрап, олар келесі күні рейспен ұша алғанын жеткізді.
Жолаушы Арье Козуч Canadian Press агенттігіне берген сұхбатында, баланың тәртіпсіз болмағанын, ал әлеуметтік желіде ата-ананы сынаған пікірлер жағдайды толық көрсетпейтінін айтты. Оның айтуынша, бала орындықтың астына тығылып, белдік тағуға мәжбүрлегенде сырғып шығып кеткен. "Бұл 150 адам отырған ұшақтағы бала еді... Ол қатты қорқып, алдындағы орындықтың астына тығылған. Бұл жүгіріп жүріп айғайлаған баладан мүлде бөлек жағдай", - деді ол.
Тағы бір жолаушы Хиллари Херцберг әуекомпанияның баяу әрекет еткенін айтты. "Бұл өте ұзаққа созылды. Бала ұшақтан 11:30-да түсті, сол кезде біз ұшақта бір сағатқа жуық отырғанбыз", - деді ол CBC-ге. Porter Airlines жолаушыларды келесі күнгі басқа рейске қайта тіркегенін хабарлады.