Қандыағаштағы «Тұмар» мейрамханасының аспаздарынан, ас үй құрал-жабдықтарының беттерінен және ауыз суынан алтын стафилококк пен ішек таяқшасының бактериялары табылды, деп хабарлайды infohub.kz сайты.
Санитариялық дәрігерлер Ақтөбе облысы Қандыағаштағы «Тұмар» мейрамханасындағы жаппай улану бойынша эпидемиологиялық тергеуді аяқтады. Материалдар полицияға берілді.
Зертханалық талдаулар инфекция көзі аспаздардың өздері екенін көрсетті. Мейрамхана қызметкерлерінен алтын стафилококк (Staphylococcus aureus) анықталды. Ішек таяқшасы ас үй жабдықтарының беттерінен, дайын тағамдардан және ауыз судан табылды.
«Зардап шеккендерден стафилококк пен ішек таяқшасы табылды, бұл стафилококктық тағамдық токсикоинфекция мен жедел ішек инфекцияларын көрсетеді», — деді Ақтөбе облысы санитариялық-эпидемиологиялық бақылау департаменті басшысының орынбасары Жансерік Құлманов.
Мамандар өрескел бұзушылықтарды анықтады. Аспаздар тағамды технологияны бұза отырып дайындаған, өнімдердің қауіпсіздігі туралы құжаттары болмаған, дезинфекция жүргізілмеген, ал персонал міндетті медициналық тексеруден өтпеген. Іс ҚР Қылмыстық кодексінің 304-бабы бойынша полицияға берілді.
Барлық зардап шеккендер ауруханадан шығарылды. Бұған дейін «Тұмар» мейрамханасына барғаннан кейін 100-ден астам адам медициналық көмекке жүгінгені хабарланған. Қонақтар екі күн қатарынан мейрамханада өткен аза мен тойға қатысқан. Уланғандар Мұғалжар аудандық ауруханасы мен Ақтөбедегі облыстық жұқпалы аурулар ауруханасына жатқызылды. Мейрамхана сол күні жабылды. Кінәлілер 2 жылға дейін бас бостандығынан айырылуы мүмкін.