Американдық рэпер Канье Уэст (Ye) Португалиядағы «Алгарве» стадионында өнер көрсетіп, шамамен 34 мың көрермен жинады. Бұл оның Алматыдағы көптен күткен концерті алдындағы маңызды дайындық болды, деп хабарлайды infohub.kz сайты.
Бұған дейін әртіс Ұлыбритания, Франция, Польша, Италия және Чехиядағы гастрольдері тоқтатылған еді, ал Австралия оған кіру визасын беруден бас тартты. Португалияда да концертті өткізбеу туралы үндеулер айтылды, атап айтқанда, Израиль елшісі бұл бастаманы жария түрде қолдады. Алайда ұйымдастырушылар концертті кейінге шегеруден немесе өткізбеуден бас тартты, нәтижесінде іс-шара тыныш өтті.
Ye сахнаға белгіленген уақыттан шамамен 45 минут кеш шықты. Шоу барысында ол өзінің ең танымал хиттерін орындады, соның ішінде Stronger, Gold Digger және American Boy, сондай-ақ сахнаға қызы Норт Уэстті шақырды. Еуропалық БАҚ-тың айтуынша, әртіс саяси мәлімдемелер жасамаған.
Турдың келесі нүктесі Қазақстан болады. 14 тамызда Канье Уэст Алматыдағы Орталық стадионда өнер көрсетуі тиіс. Бұған дейін мегаполиске концертке арналған 100 тоннадан астам техникалық жабдық жеткізілетіні хабарланған болатын. Алматыға барлық сахналық құрылымдармен, жарықпен және дыбыспен шамамен 15 фура жолға шығады.