Каспий теңізінде 14 мерзімді әскери қызметшінің өмірін жалмаған қайғылы оқиғаға байланысты соттың санкциясымен алты лауазымды тұлға қамауға алынды. Олар әскери-теңіз жаттығуларын ұйымдастыруға және өткізуге жауапты болған. Тергеу басқа да басшылардың қатысы бар-жоғын тексеріп жатыр, деп хабарлайды infohub.kz сайты.
NUR.KZ тілшісіне Қазақстан Республикасы Ішкі істер министрлігінің баспасөз қызметі хабарлағандай, әскери-тергеу департаментінің басшылығымен ведомствоаралық жедел-тергеу тобы Ақтаудағы төтенше оқиға фактісі бойынша сотқа дейінгі тергеу жүргізіп жатыр.
Қылмыстық іс Қазақстан Республикасы Қылмыстық кодексінің «Қызметке немқұрайлы қарау» және «Кеме жүргізу ережелерін бұзу» баптары бойынша тергелуде.
«Сотқа дейінгі тергеу аясында соттың санкциясымен әскери-теңіз жаттығуларын ұйымдастыруға және өткізуге жауапты алты лауазымды тұлғаға қамауға алу түріндегі бұлтартпау шарасы қолданылды», — делінген ведомствоның сауалға берген жауабында.
ІІМ қылмыстық іс бойынша қазір қажетті тергеу және жедел-іздестіру іс-шараларының кешені жүргізіліп жатқанын қосты. Олар болған оқиғаның барлық мән-жайын, сондай-ақ салдарға әкеп соққан себептер мен жағдайларды анықтауға бағытталған.
«Сондай-ақ өзге де лауазымды тұлғалардың қатысы тексеріліп жатыр. Сотқа дейінгі тергеу нәтижелері бойынша әскери-теңіз жаттығуларын жоспарлауға, ұйымдастыруға және өткізуге қатысқан барлық лауазымды тұлғалардың әрекеттеріне Қазақстан Республикасының заңнамасына сәйкес тиісті құқықтық баға беріледі», — деп қосты ІІМ.
Баспасөз қызметі сотқа дейінгі тергеудің өзге деректері жариялауға жатпайтынын атап өтті.
Еске салайық, 24 қыркүйекте оқу-жауынгерлік міндетті орындау барысында ауа райының кенеттен және күрт нашарлауы мен екпінді желдің салдарынан Каспий теңізіне 17 әскери қызметші ұшырап, олардың 14-і қаза тапты. Үшеуі құтқарылды.
Қайғылы оқиғадан кейін Дәурен Қосанов қорғаныс министрі қызметінен босатылды. Оның орнына Айдос Мырзахметов тағайындалды.
Бұған дейін Қазақстан Республикасы Қарулы күштері Әскери-теңіз күштерінің бас қолбасшысы қызметін Қанат Ниязбеков атқарған. Ол да 2025 жылдың тамызынан бері атқарып келген қызметінен айырылды.
Сондай-ақ Қорғаныс министрлігінің жоғары қолбасшылық құрамындағы бес лауазымды тұлғаның ұсталғаны хабарланған. Олардың қатарында штаб бастығы — Қазақстан Республикасы Қарулы күштері Әскери-теңіз күштерінің бас қолбасшысының бірінші орынбасары, екі әскери бөлім командирі, сондай-ақ теңіз жаяу әскері ротасының және катер командирлері бар.
ІІМ Каспийдегі қайғылы оқиғаға байланысты ұсталғандар саны одан да көп болуы мүмкін екенін жоққа шығармаған. Көп ұзамай Қазақстан Республикасы Қарулы күштері Әскери-теңіз күштерінің экс-бас қолбасшысы Қанат Ниязбеков ұсталды.