Катарлық Power International Holding Tele2 және Altel брендтерімен жұмыс істейтін «Мобайл Телеком-Сервис» операторын сатып алу мәмілесі бойынша төлемдерін жалғастырып келеді. Қазіргі таңда қазақстандық тарапқа қарыз әлі де айтарлықтай — шамамен $375 млн, деп хабарлайды infohub.kz сайты.
Мәлім болғандай, 2026 жылдың қаңтарында «Самұрық-Қазына» тобы «Мобайл Телеком-Сервис» операторын сату бойынша катарлық Power International Holding-тен екінші транш ретінде 12,9 млрд теңге алды. Шарт талаптарына сәйкес, катарлық тарап алдағы екі жылда тағы шамамен $375 млн төлеуі тиіс.
«Самұрық-Қазына» қоры 2026 жылдың алты айында Tele2 және Altel брендтерімен байланыс қызметін көрсететін «Мобайл Телеком-Сервис» (МТС) компаниясын сату туралы келісім бойынша кезекті транш алғанын хабарлады. Оның сомасы 12,9 млрд теңгені құрады. Бұрын МТС иесі болған «Қазақтелекомның» есептілігінде қаңтарда түскен долларлық баламасы — $25,4 млн да көрсетілген.
Мәміле 2025 жылдың 14 қаңтарында жабылды: Power International Holding холдингіне кіретін катарлық PIH Communication компаниясымен МТС-тегі 100% үлесті $1,1 млрд-қа беру туралы келісімге қол қойылды. Бұл сома шын мәнінде екі бөлікке бөлінді — Tele2 мен Altel бақылауының PIH-ке өтуін қамтамасыз еткен $700 млн алдын ала төлем және үш жыл ішінде төленуге тиіс шартты сыйақы.
Сыйақы мөлшері $400 млн болды (шарт жасалған күнгі бағаммен 370 млрд теңгеге тең). Осы соманың ішінен катарлықтар алдын ала төлемнен кейін бір жыл өткен соң бір ғана транш — сол $25,4 млн аударды. Ағымдағы жылы келісімшарт бойынша тағы төлемдер бола ма, белгісіз. Осылайша, шарт бойынша PIH әлі $375 млн төлеуі тиіс.
Сонымен қатар «Самұрық-Қазына» әділ құны бойынша бағаланған сыйақы, яғни катарлық тарап алдын ала төлемнен кейін төлеуі тиіс бүкіл сома $400 млн емес, $349 млн екенін атап өтті. Өз кезегінде «Қазақтелеком» қалған қарызды әділ құны бойынша $344 млн деп бағалайды.
Айта кетейік, «Қазақтелеком» акцияларының 91,3%-ы «Самұрық-Қазынаға» тиесілі. PIH холдингінің иелері тең үлеспен катарлық кәсіпкерлер Мутаз Әл-Хаят пен Рамез Әл-Хаят болып табылады. Олар сондай-ақ Lesha Bank арқылы Bereke Bank-ті сатып алған.
Бұған дейін Kcell мен Tele2 ұялы операторлары 2022 жылы базалық станцияларды бірлесіп салу және пайдалану туралы келіскені хабарланған. Туындаған келіспеушіліктерге байланысты олар бір-бірінен миллиардтаған теңге көлемінде айыппұл өндіруді талап етіп отыр.