Шығыс Қазақстан облысындағы Катон-Қарағай ұлттық паркінің аумағында туристер туристік карталарда «Нұрсұлтан Назарбаевтың станы» деп белгіленген қаңырап қалған нысанды тапты. Аймақ ыдыс-аяқ сынықтарына, интерьер заттарына және демалыс орнының қалдықтарына толы. Бұл жердің Қазақстанның тұңғыш президентіне қандай қатысы бар және неге қараусыз қалғаны туралы «Курсивке» ШҚО аудандық әкімдігі жауап берді, деп хабарлайды infohub.kz сайты.
Редакцияға ұсынылған суреттерде жерге көмілген тарелка сынықтары салынған қоқыс қаптары, алтын жалатылған люстра, баспалдақ және киіз үйлерге арналған ағаш төсеніштер көрінеді.
«Назарбаев станы» деген атау туристер арасында онлайн-карталардағы белгіге байланысты қалыптасқан. Алайда аумақты дәл осылай кім белгілегені және бұл жерде экс-президенттің шынымен тоқтағаны белгісіз.
ШҚО Катон-Қарағай ауданының әкімдігінде аймақтың «Нұрсұлтан Назарбаевтың станы» деген ресми атауы жоқ екенін және тұңғыш президенттің өңірге сапарларына ешқандай қатысы жоқ екенін мәлімдеді.
«Электрондық карталардағы аймақ атауын жасаушылар немесе басқа пайдаланушылар көрсеткен болуы мүмкін деп есептейміз», — деді әкімдікте.
Алайда жергілікті билік бұл учаскенің туризм және рекреация аймағына кіретінін нақтылады. Заң бойынша мұндай учаскелерде туристік маршруттар, соқпақтар ұйымдастыруға, тұрақтар мен бақылау алаңдарын салуға рұқсат етіледі. Бұл жердегі туристік инфрақұрылым ұлттық парк құрылымына кіретін «Ақ Берел» турмаршрутын жайластыру кезінде салынған.
«Қазіргі таңда туристік инфрақұрылымды ұлттық паркке келушілер және ҚР ҰҚК ШҚ палаткалық лагерьлер орнату үшін пайдаланып жүр», — деп түсіндірді аудандық билік.
Анықталғандай, Нұрсұлтан Назарбаев 2013 жылы ұлттық парк аумағындағы Мұзтау тауы маңына шынымен барған. Сапар туралы әсерімен ол №64 лицейдің астаналық оқушыларымен бөліскен. Экс-мемлекет басшысы аймақты тікұшақпен айналып ұшып, оны аса қызықты әрі тартымды жер деп атаған.
Катон-Қарағай ауданының әкімдігінде туристерден қалған тазартылмаған қоқысты жету қиын аумақпен және автомобиль жолдарының жоқтығымен түсіндірді.
«Бар қоқысты жинау және шығару ұлттық парк қызметкерлерінің күшімен атпен мезгіл-мезгіл жүргізіледі», — деп түсіндірді аудандық билік.
Сонымен қатар әкімдікте аумақта құрылымдар жыл сайын жөнделетінін, ал жарамсыз нысандар бұзылатынын уәде етті.
Бұған дейін «Курсив» ШҚО-ның тағы бір танымал туристік нысаны — «Рахман бұлақтары» курорты үшін медициналық лицензиясы және санаторий саласында тәжірибесі бар инвесторлар ізделіп жатқанын жазған.