Қазақстанда аномальды ыстық салдарынан алты цемент-бетон трассада температуралық деформация пайда болды. Жол қызметі жабынды жедел қалпына келтірді, деп infohub.kz сайты хабарлайды.
«КазАвтоЖол» мәлімдеуінше, аномальды ыстыққа байланысты жол қызметкерлері цемент-бетон төселген автомобиль жолдарын тәулік бойы бақылауда ұстауда. Жалпы ұзындығы 1 636,5 км трассалар тұрақты назарда.
Жоспарлы тексерулер кезінде мамандар Жамбыл, Павлодар және Түркістан облыстарында алты учаскеден жергілікті температуралық деформация тапты. Ақауларды жоюға елуден астам маман жұмылдырылды. Барлық анықталған зақымдар қысқа мерзімде жойылып, көлік қозғалысы шектеусіз жалғасты.
Ведомство түсіндіргендей, экстремальды ыстықта цемент-бетон жабындысының беті +60…+70 °C және одан да жоғары қызуы мүмкін. Осыған байланысты бетон тақталарында ішкі кернеулер пайда болып, жергілікті деформацияға әкеледі. Мұндай құбылыстар ұзақ ыстық кезеңдерінде көптеген елдерге тән болып саналады.