2026 жылдың 1 қаңтарынан бастап жалпы белгіленген салық режимінде жұмыс істейтін қазақстандық компаниялар оңайлатылған декларация негізіндегі арнаулы салық режимін қолданатын салық төлеушілерден сатып алынған тауарлар, жұмыстар мен көрсетілетін қызметтер бойынша шығыстарды корпоративтік табыс салығын (КТС) есептеу кезінде есепке алу құқығынан айырылады, деп хабарлайды infohub.kz сайты.
Бұл шектеу 2026 жылдың басынан күшіне енген Салық кодексінің жаңа редакциясында бекітілген. 286-бапта «Шегерімге жатпайтын шығыстар» оңайлатылған режимдегілермен жасалған мәмілелер бойынша шығындар шегерімге жатпайтыны тікелей көрсетілген. Осылайша, егер жалпы режимдегі компания оңайлатылған декларацияны қолданатын контрагенттен тауар, жұмыс немесе қызмет сатып алса, тиісті сома КТС есептеу кезінде салық базасын азайта алмайды.
Ақмола облысы бойынша мемлекеттік кірістер департаментінде салық органдары мұндай мәмілелерді қалай анықтайтынын түсіндірді. Ол үшін салық есептілігінің деректерін, басқа мемлекеттік органдардың мәліметтерін және басқа көздердегі ақпаратты салыстыру жоспарлануда. Сәйкессіздіктер анықталған жағдайда салық төлеушіге хабарлама жіберілуі мүмкін.
Сонымен қатар, контрагенттер мен шығыстар құрылымы туралы ақпарат салық тәуекелдерін бағалау кезінде ескерілетін болады. Нақты операциялардың құжаттары мен нақты мән-жайлары салық тексерулері аясында олардың түріне, нысанасына және белгіленген рәсіміне қарай зерттелуі мүмкін.
Ведомствода бұл тыйым арнаулы салық режимі салық міндеттемелерін азайту үшін жасанды түрде шығыстарды көбейту, жеткізу тізбектерін құру немесе жалған мәмілелер жасау арқылы пайдаланылатын теріс пайдаланулардың алдын алу үшін енгізілгенін атап өтті.
Бұған дейін «Курсив» 15 қыркүйекке дейін қазақстандықтардың бір бөлігі 2025 жыл үшін 270.00 нысаны бойынша кірістер мен мүлік туралы декларация тапсыруы керектігін жазған болатын. Онда, атап айтқанда, 78,64 млн теңгеден асатын ірі сатып алуларды, шетелдік мүлік пен шоттарды, цифрлық активтерді көрсету, сондай-ақ емдеу, оқу, ипотекалық пайыздар мен ерікті зейнетақы жарналары бойынша салық шегерімдеріне құжаттарды тексеру қажет.