Жеке мектептерді қаржыландыруды цифрландыру Қазақстанға төрт айда 8 млрд теңге үнемдеуге мүмкіндік берді, деп хабарлайды infohub.kz сайты.
Үкімет баспасөз қызметінің мәліметінше, енді мемлекеттік білім беру тапсырысы тексерілген деректер негізінде есептеледі, ал білім беру қызметтеріне ақы төлеу цифрлық құралдар арқылы жүзеге асады.
2025 жылдың күзінде Қазақстанда OrtaBilim сервисі іске қосылды. Ол жеке мектептердің жан басына шаққандағы қаржыландыруын Қаржы министрлігінің e-Qazyna платформасына аударды. Мемлекеттік тапсырысты орналастыру білім беру басқармаларына берілді.
Қаржыландыру сомасы оқушылар саны, оқу жағдайлары және белгіленген нормативтер ескеріле отырып, автоматты түрде есептеледі. Контингент туралы деректер «Күнделік» жүйесі және басқа да мемлекеттік органдардың дерекқорларымен интеграция арқылы нақты уақыт режимінде тексеріледі.
Қазіргі уақытта платформада 899 жеке мектеп цифрландырылған. 2026 жылдың қаңтар–мамыр айларында оператор 749 мектептің актілерін 102,9 млрд теңгеге төледі.
Цифрлық тексеру оқуға арналмаған ғимараттарда — коттедждерде, кеңселерде және бұрынғы өндірістік үй-жайларда орналасқан 145 мектепті анықтады. Олар бойынша мемлекеттік тапсырыс көлемі 38 млрд теңгені құрайды.
2027 жылдың 1 қаңтарынан бастап ғимараттары білім беру қызметіне арналмаған жеке мектептерде мемлекеттік тапсырыс қаржыландырылмайды.
Осы уақытқа дейін мектеп иелері нысандарды санитарлық және қала құрылысы талаптарына сәйкестендіре алады. Реформа бюджет қаражатын шынымен білім беру қызметін көрсететін және белгіленген нормаларға сәйкес келетін мектептердің алуына бағытталған.