Қарағанды облысында полицейлер алғаш рет жасанды интеллектімен жабдықталған робот-итті қызметке қосты. Ол тобыр ішінен төрт құқық бұзушыны табуға көмектесті. infohub.kz Polisia.kz-ке сілтеме жасап хабарлағандай, екі күндік жұмыс барысында жаңа технология бұқаралық іс-шаралар кезінде төрт адамды анықтады. Роботты Балқаш пен Теміртаудағы Металлург күнін мерекелеуде сынақтан өткізді.
17–18 шілдеде өткен шараларға 115 мыңнан астам адам қатысты. Қауіпсіздікті қамтамасыз ету үшін полиция жеке құрамды күшейтілген режимге көшіріп, 1 мыңнан аса қызметкерді тартты.
Полицияның ақпараттық базасымен интеграцияланған робот-ит нақты уақыт режимінде адамдардың бетін тани алады. Бұл іздеулі жүрген азаматтарды тезірек анықтауға және құқық бұзушылықтардың алдын алуға мүмкіндік береді.
Қызмет барысында робот төрт адамды тапты: алимент төлемеген борышкер, мемлекет алдында қарызы бар екі азамат және сот үйден тыс жүруге тыйым салған бұрын сотталған ер адам. Барлық құқық бұзушыларға заңда көзделген шаралар қолданылды.
Сонымен қатар полицейлер 3 пен 17 жас аралығындағы жоғалған 87 баланы тауып, ата-аналарына қайтарды.
Полиция роботты технологияларды қолдану ішкі істер органдарын цифрлық трансформациялаудың кезекті кезеңі екенін атап өтті. Ведомствоның пікірінше, мұндай шешімдер қоғамдық тәртіпті қорғау тиімділігін арттырып, азаматтардың қауіпсіздігін жаңа деңгейде қамтамасыз етуге мүмкіндік береді.
Бұған дейін полиция роботтары Астананың сауда орталықтары мен вокзалдарында, ал робот-иттер Ақтау көшелерінде патрульдік қызмет атқаратыны хабарланған болатын.