Назарбаев Университетінің BULAN командасы Гонконгте өткен ABU Robocon 2026 халықаралық робототехника чемпионатында Mabuchi Motor Award арнайы сыйлығын жеңіп алды, деп хабарлайды infohub.kz сайты.
Ғылым және жоғары білім министрлігіндегілердің айтуынша, жарысқа 21 елдің университет командалары қатысты.
«Mabuchi Motor Award инженерлік шешімдердің өзіндік ерекшелігі, механикалық құрылым сапасы және механикалық, электрондық және бағдарламалық компоненттердің тиімді үйлесімі үшін беріледі. Чемпионатқа қатысу Қазақстан үшін жеті жылдық үзілістен кейін ABU Robocon халықаралық аренасына қайта оралу болды. Биылғы ұлттық іріктеу мен құраманы дайындауды USTEM Foundation қоғамдық қоры ұйымдастырды», – деп атап өтті ведомствода.
Іріктеу кезеңі 1 шілдеде Almaty Tech Cup аясында өтті. Қорытындысы бойынша Назарбаев Университетінің BULAN командасы жеңіске жетіп, Гонконгтегі финалда Қазақстанның атынан қатысу құқығын алды.
Құрамаға әртүрлі мамандықтардың 28 студенті – механиктер, электрониктер, бағдарламашылар, дизайнерлер және жоба менеджерлері енді. Халықаралық кезеңде елді Мейіржан Таздарбай, Темірлан Амангелді, Аймедет Тауфик, Фаршед Иброхимов және Дастан Мұсрепов таныстырды.
Mabuchi Motor Award жапондық Mabuchi Motor компаниясының шағын электр қозғалтқыштарын өндіруге маманданған компаниясының сыйлығы. Ол жобалауға ерекше көзқарас танытқан, механикалық инженерияның жоғары деңгейін көрсеткен және технологияларды кешенді қолданған командаларға беріледі.