Демалысқа ұшу алдында казақстандық туристерге өз турларының кепілдік жүйесінде тіркелгеніне және TourCode болуына көз жеткізу ұсынылады, деп хабарлайды infohub.kz сайты.
«Туристік Қамқор» қорында TourCode турдың кепілдік жүйесімен қорғалғанын растайтынын түсіндірді. Күтпеген жағдайлар туындаған кезде жүйе заңнамаға сәйкес туристердің Отанға қайтарылуын қамтамасыз етеді.
TourCode-тің болуын үш жолмен тексеруге болады: «Туристік Қамқор» ресми сайтында, TourCode мобильді қосымшасында, сондай-ақ Астана, Алматы, Шымкент, Ақтөбе және Атырау әуежайларындағы ақпараттық стендтерде.
Бұған дейін Туризм және спорт министрлігі казақстандықтарға тур сатып алар алдында турагенттіктен сатудың заңдылығы мен құқықтық қорғанысты растайтын құжаттар пакетін сұрауды ұсынған болатын. Ең алдымен турагенттік қызметтің басталғаны туралы хабарламаның болуына және агенттіктің мемлекеттік электрондық тізілімге енгізілгеніне көз жеткізу қажет.
Маңызды кезең — туристік қызмет көрсету шартына қол қою, онда сапар елі мен күндері, толық құны, төлем және болдырмау шарттары, тараптардың жауапкершілігі және ақша қайтару тәртібі нақты көрсетілуі тиіс.
Қаржылық құжаттарға ерекше назар аудару керек: төлем жасағаннан кейін міндетті түрде фискалдық чек талап етіңіз. Менеджерлердің жеке шоттарына ақша аудармаңыз — тек ресми төлем құжаты ғана мәміленің дәлелі болып табылады.
Брондау расталғаннан және толық төлем жасалғаннан кейін агент саяхатқа қажетті құжаттар пакетін беруге міндетті, оған қонақүй, тамақтану және трансфер көрсетілген ваучер, авиабилеттер немесе маршрут-түбіртектер, сақтандыру полисі және туристердің құқықтарын міндетті кепілдік жүйесі аясында қорғауды қамтамасыз ететін туркод кіреді.