Қазақстан — Өзбекстан — Ауғанстан — Пәкістан (CASA) теміржол бағытын Пәкістанның теңіз порттарына шыға отырып бірлесіп пысықтау туралы меморандумға үш елдің бейінді министрліктері қол қойды, деп хабарлайды infohub.kz сайты.
Қазақстан үкіметінің баспасөз қызметі мәлім еткендей, келісімге Қазақстан мен Өзбекстанның көлік министрліктері, сондай-ақ Біріккен Араб Әмірліктерінің Энергетика және инфрақұрылым министрлігі қатысты.
Жоба Орталық және Оңтүстік Азия арасында жаңа теміржол бағытын қалыптастыруды көздейді. Ол халықаралық тасымал, сауда, логистика және инвестициялық ынтымақтастық мүмкіндіктерін кеңейтуге бағытталған.
Меморандум аясында тараптар техникалық және экономикалық зерттеулер жүргізіп, талдамалық бағалаулар дайындауды және қажетті теміржол инфрақұрылымы мен оған байланысты нысандарды дамытудың орындылығын зерделеуді жоспарлап отыр.
Үкіметте атап өткендей, Қазақстан мен Өзбекстан дамыған теміржол инфрақұрылымына және айтарлықтай транзиттік әлеуетке ие. Біріккен Араб Әмірліктері болса көлік инфрақұрылымы, логистика және ірі инвестициялық жобаларды жүзеге асыру саласында халықаралық тәжірибеге ие. Тараптар бұл мүмкіндіктерді CASA-ны практикалық пысықтауға және оны іске асыру тетіктерін айқындауға пайдаланбақ.
Қатысушылар сондай-ақ алдағы қадамдар мен бірлескен жұмыстың бағыттарын талқылады. Атап айтқанда, жобаның техникалық, экономикалық және қаржылық мәселелерін кешенді пысықтау үшін жұмыс тобын құру қарастырылуда.
Бұған дейін «Курсив» 2026 жылдың маусымында вице-премьер Серік Жұманғарин Кабулдағы келіссөздерде CASA дәлізін дамытуды қолдағанын жазған еді. Ол Пәкістанның Карачи және Гвадар порттары бағытында 10 млн тоннаға дейін жүк тасымалдауды қамтамасыз ете алады.