Вьетнамдағы Қазақстан мәдениет күндері аясында ҚР вице-премьері — мәдениет және ақпарат министрі Аида Балаева Вьетнам Социалистік Республикасы премьер-министрінің орынбасары Фам Тхи Тхань Чамен кездесті. Тараптар екіжақты қарым-қатынастарды одан әрі дамытудың перспективалық бағыттарын талқылады, деп хабарлайды infohub.kz.
Балаеваның айтуынша, өткен жылы екі мемлекет стратегиялық әріптестік деңгейіне шыққаннан кейін олардың қарым-қатынасы жаңа кезеңге аяқ басты. Бұл саяси және экономикалық байланыстарды ғана емес, мәдени-гуманитарлық ынтымақтастықты тереңдетуге де жағдай жасайды.
«Біз Вьетнамдағы мәдени және креативті индустриялардың дамуын үлкен қызығушылықпен бақылап отырмыз. Мұнда кино, орындаушылық өнер, мәдени туризмнен бастап мұраны сақтау, дәстүрлі қолөнер және заманауи дизайнға дейінгі ынтымақтастықтың бірқатар перспективалық бағыттарын көріп отырмыз. Осы салаларда тәжірибе алмасу біздің ынтымақтастығымызға жаңа серпін бере алатынына сенімдімін», — деп атап өтті ол.
Келіссөздерде креативті туризмді дамытуға ерекше назар аударылды. Бұл формат саяхатшылардың дәстүрлі қолөнер, гастрономия, шеберлік сабақтары және шығармашылық бағдарламаларға қатысу арқылы жергілікті мәдени ортаға терең енуін көздейді.
Сонымен қатар, Аида Балаева кинематография саласындағы ынтымақтастықты жандандыруды ұсынды. Атап айтқанда, Қазақстан мен Вьетнамда өзара киноапталықтар өткізу, екі ел кинематографистерінің халықаралық фестивальдерге қатысуын кеңейту және екі елдің аумағында түсірілімдер ұйымдастыру.
Тағы бір басым бағыт — кешенді туристік бағыттарды құру жұмысы. Олар Қазақстан мен Вьетнамның мәдени мұра объектілерін, тарихи қалаларын, мұражайларын, қолөнер орталықтарын және заманауи арт-кеңістіктерін біріктіреді.
Кездесу қорытындысы бойынша тараптар бірлескен бастамаларды жүзеге асыруға өзара қызығушылықтарын растады.