Грузияда қазақстандық жүргізушіге қатысты сот процесі өтіп жатыр. Ол психотроптық заттарды сақтау және тасымалдау деп айыпталуда. Туыстарының айтуынша, дәрі-дәрмектерді дәрігер тағайындаған, деп хабарлайды infohub.kz.
Щучинск қаласының тұрғыны Юлия Чекулаева күйеуі Иван Чекулаевтың сәуір айында жүк көлігімен Грузияға кезекті рейске шыққанын айтты. Оның сөзінше, ер адамның қасында Германиядағы дәрігер тағайындаған ауырсынуды басатын дәрілер болған. Алайда Поти портындағы кеденде ер адамнан Грузияда психотроптық зат ретінде жіктелетін дәрі табылып, ол ұсталды.
«Біз оны рейстен күттік, үйге оралғанын қалаймыз. Ол өте сабырлы, жауапты жігіт, ол ештеңе істей алмайды. Тек қасында қағазы болмаған. Қағазсыз біз сол кезде ешкім емеспіз», — деді Юлия Чекулаева.
Әйелдің айтуынша, күйеуіне арқасындағы ауырсынуға қарсы дәріні Германиядағы дәрігер жазған, бірақ рецепті қолында болмаған. Осыған байланысты Грузия заңдары бойынша ол ұсталып, сотқа берілді. 44 жастағы қазақстандыққа 15 жылға дейін бас бостандығынан айыру жазасы қауіп төніп тұр.
Қазақстан Сыртқы істер министрлігі жағдайға түсініктеме берді: «Қолдағы ақпаратқа сәйкес, аталған азаматқа қатысты Грузия Қылмыстық кодексінің 262-бабының 1-бөлігі бойынша қылмыстық іс қозғалды. Бұл бап есірткі немесе психотроптық заттарды сату мақсатынсыз заңсыз сақтау немесе тасымалдау үшін жауапкершілікті көздейді. Қазақстанның Грузиядағы дипломаттары өз құзыреті шеңберінде отандасымызға қажетті консулдық-құқықтық көмек көрсетуде. Бұл мәселе министрліктің бақылауында».