Қазақстан жарты жыл ішінде инвестициялық рейтингте 17 сатыға көтеріліп, 150 мемлекеттің арасында 53-ші орынға жайғасты. Бұл — 2026 жылғы мамырдағы Safest Countries for Investors рейтингінің қорытындысы, деп хабарлайды infohub.kz сайты.
2025 жылдың қазанында республика 70-ші орында болған еді. Мұндай нәтиже елдің экономикалық тұрақтылығына халықаралық сенімнің артқанын және макроэкономикалық тұрақтылықты қамтамасыз ету, институттарды дамыту мен қолайлы инвестициялық ахуал қалыптастыру саясатының тиімділігін көрсетеді. Қазақстан аймақта көшбасшылығын сақтап, Орталық Азияның барлық елдерінен, сондай-ақ экономикасы ірі бірқатар мемлекеттерден озып тұр.
Бұл рейтингтің ерекшелігі — тартылған инвестиция көлеміне емес, ұзақ мерзімді экономикалық тұрақтылық пен мемлекеттік институттар тұрғысынан салым қауіпсіздігінің деңгейіне баға беруінде. Әдістеме макроэкономикалық тұрақтылық, мемлекеттік басқару сапасы, саяси және валюталық тәуекелдер, реттеуші ортаның тиімділігі, сондай-ақ экономиканың сыртқы дағдарыстарға төтеп беру қабілеті сияқты кең ауқымды факторларды ескереді. Қазақстанның жоғары серпіні халықаралық инвесторлардың елді болжамды әрі салыстырмалы түрде тұрақты юрисдикция ретінде қабылдайтынын көрсетеді.
Қазақстанның инвестициялық тартымдылығын одан әрі нығайту мемлекеттік институттар сапасын жүйелі түрде арттыруға, инвесторларды қорғау тетіктерін жетілдіруге және бизнес жүргізудің ашық жағдайын қамтамасыз етуге байланысты. Оң серпіннің сақталуы елдің халықаралық рейтингтердегі орнын жақсартып қана қоймай, шетелдік капитал тарапынан сенім деңгейін арттырып, Қазақстанның тұрақты экономикалық өсуі мен жаһандық инвестициялық нарықтағы бәсекеге қабілеттілігін нығайтуға қосымша фактор болады.