Жаңа оқу жылынан бастап Қазақстанның мектептері мен балабақшаларында мінез-құлық мәдениеті мен этикалық нормаларды қалыптастырудың кешенді бағдарламасы басталады. Бұл туралы infohub.kz сайты хабарлайды.
ҚР Оқу-ағарту министрі Жұлдыз Сүлейменованың айтуынша, еліміздегі оқу орындарындағы тәрбие жұмысы «Адал Азамат» тұжырымдамасы аясында жүйелі жалғасын табады. Өзгерістер мектепке дейінгі ұйымдардан бастап бітіруші сыныптарға дейінгі білім берудің барлық деңгейін қамтиды.
«Қоғамның жаңа этикалық бағдарларын қалыптастыру міндеті тәрбие жұмысының маңызды бөлігіне айналады. Мінез-құлық нормалары мен қоғамдық мәдениет «Адал Азамат» бағдарламасы аясында балабақшадан бастап бітіруші сыныпқа дейін дәйекті түрде қалыптасады. Жаңа оқу жылынан бастап арнайы сабақтар басталады — мінез-құлық мәдениеті, айналадағыларға құрмет және қарым-қатынас дағдылары жаңа KPI бөлігіне айналады», — деп атап өтті Жұлдыз Сүлейменова.
Жұмыстың жеке бағыты табиғатқа ұқыпты қарауды қалыптастырумен байланысты. 2026 жылдың соңына дейін «Таза Қазақстан» ұлттық тұжырымдамасы аясында экологиялық білім берудің бірыңғай стандартын енгізу, сондай-ақ қоршаған ортаны қорғауға бағытталған арнайы жобаны іске қосу жоспарлануда.
Министр оқушылардың қауіпсіздігі мен психологиялық салауаттылығы ведомствоның сөзсіз басымдығы болып қала беретінін де атап өтті. Қабылданып жатқан профилактикалық шаралар қазірдің өзінде нәтиже беруде. Бірінші жартыжылдықта жасөспірімдер арасындағы қылмыс 4%-ға төмендеді. Арнайы есепте тұрған кәмелетке толмағандар саны тағы 40,5%-ға азайды.
Білім министрлігінің басшысы қорытындылағандай, ведомствоның басты мақсаты — іргелі білім беріп қана қоймай, әр баланың толық қауіпсіздігін қамтамасыз етіп, базалық құндылықтарды сіңіретін мектеп қалыптастыру.