Қазақстан ішіндегі демалыс жедел қарқынмен қымбаттап келеді: 2026 жылғы маусым қорытындысы бойынша «Демалыс және мәдениет» санатындағы бағалар жылдық көрсеткіште 17,3%-ға өсті, бұл еліміздегі жалпы инфляциядан шамамен 7 пайыздық тармаққа жоғары, деп хабарлайды infohub.kz сайты.
Energyprom сарапшыларының айтуынша, жоғары өсім 2023 жылдан бері байқалып келеді. 2017–2022 жылдары бағалар жылына 3,8–8,3%-ға өссе, соңғы үш жылда көрсеткіш 13,8–19% деңгейінде тұр. Мамандардың нақтылауынша, «Демалыс және мәдениет» санаты тек туристік сапарларды ғана емес, қонақ үй қызметтері, туристік жабдықтар және басқа да демалыс түрлерін қамтиды, сондықтан бұл деректерді тек туристік сапарлардың қымбаттауы ретінде түсінуге болмайды.
«Кешенді демалысты ұйымдастыру» санаты одан да жылдам қымбаттауда: бір жыл ішінде бағалар 27,8%-ға, ал кейбір өңірлерде 30%-дан астамға өсті. Осыған қарамастан, ішкі туризм өсуін жалғастыруда. 2025 жылы орналастыру орындарында 10,1 млн ішкі турист тұрды — бұл бір жыл бұрынғыдан бір миллионға жуық көп. Ішкі келушілердің туристік сапарлар кезіндегі шығындары 659,2 млрд теңгені құрады. Көлік қызметтеріне шығындардың 25,5%-ы, тамақтануға 20,8%-ы, ал орналастыруға 12,2%-ы тиесілі болды.
Баға өсімі аясында курорттар қонақтарды тартудың жаңа тәсілдерін енгізуде. Мысал ретінде 2026 жылы Oi-Qaragai тау курорты енгізген «Отан» тарифін алуға болады: Қазақстан азаматтары үшін бірқатар қызметтерге шетелдік туристермен салыстырғанда 20% жеңілдік қарастырылған. 2026 жылдың бірінші тоқсанының қорытындысы бойынша орналастыру орындары 2 млн-ға жуық адамға қызмет көрсеткен, ал оларды ел ішінде пайдаланған қазақстандықтар саны 3,6%-ға өскен.
«Халықаралық тәжірибе көрсеткендей, жергілікті тұрғындар үшін арнайы жағдайлар ішкі сұранысты қолдауға, туристік нысандардың жүктемесін реттеуге және халық шығындарының бір бөлігін ұлттық экономика ішінде ұстап қалуға көмектеседі», — деп түйіндейді сарапшылар.