Бәсекелестікті қорғау және дамыту агенттігі (АЗРК) кинотеатрлар қызметіне ортақ талаптар енгізуді ұсынды, деп хабарлайды infohub.kz.
Ведомство мамандары кинопрокат саласындағы 60-тан астам компанияның жұмысын зерттеді. 2024 жылдың 1 қаңтарынан 2026 жылдың 1 қаңтарына дейінгі кезеңде нарық көлемі 76,2 млрд теңгені құрады. Талдау барысында бәсекелестіктің дамуын тежейтін жүйелі кедергілер анықталды. Атап айтқанда, бірқатар өңірде кинопрокат қызметін бір-ақ немесе екі ғана қатысушы көрсетеді, бұл бәсекелестіктің шектеулі екенін көрсетеді.
Негізгі проблемалардың бірі — кинотеатрлар мен дистрибьюторлар арасындағы өзара іс-қимылдың бірыңғай ережелерінің жоқтығы. Фильмдерді көрсету құқығын беру шарттары кинотеатрлардың репертуар қалыптастыру мүмкіндігіне және көрермендердің кинопремьераларға қол жеткізуіне тікелей әсер етеді. Нарықта ашық және кемсітушіліксіз жағдай жасау үшін АЗРК кинопрокат қызметін жүзеге асыру ережелерін әзірлеуді, дистрибьюторлар мен кинотеатрлар арасындағы үлгілік шартты бекітуді, сондай-ақ нарық мониторингі тетіктерін жетілдіруді ұсынды.
Ведомство ұсынылған шараларды іске асыру нарық қатысушыларының фильм контентіне тең қол жеткізуін қамтамасыз етуге, кинотеатрлар мен дистрибьюторлар арасындағы өзара іс-қимылдың ашықтығын арттыруға және кинопрокат саласында адал бәсекелестікті одан әрі дамытуға жағдай жасауға мүмкіндік береді деп сенімді.