Қазақстанда 20 тамыздан бастап ұялы байланыс операторларына қатысты жаңа ережелер күшіне енеді. Енді олар абоненттерді тарифтердің көтерілетіні туралы кемінде екі ай бұрын хабардар етуге міндетті, деп хабарлайды infohub.kz сайты.
Телеарнаның мәліметінше, өзгерістер бірнеше аспектіні қамтиды. Атап айтқанда, операторлар бағаның өсуі туралы хабарламаларды SMS түрінде жіберуге, сондай-ақ қызмет құнының өзгеруі туралы ақпаратты өз интернет-ресурстарында алдын ала орналастыруға міндетті болады. Бұл абоненттерге бұрынғы операторда қалу немесе неғұрлым қолайлы жағдайларды іздеу туралы шешім қабылдауға уақыт береді.
Сонымен қатар, ұялы байланыс операторлары әлеуметтік және мемлекеттік маңызы бар мобильді қосымшаларға тәулік бойы тегін қолжетімділікті қамтамасыз етуге міндеттеледі. ҚР Цифрлық даму, инновациялар және аэроғарыш өнеркәсібі министрлігінің телекоммуникациялар комитеті байланыс саласындағы мемлекеттік саясат басқармасының басшысы Айнұр Бисенбаеваның түсіндіруінше, қазіргі уақытта мұндай қосымшалардың тізбесін айқындайтын заңға тәуелді акт әзірленуде. Алдын ала тізбеге eGov, eGov Business, eOtinish және Aitu қосымшалары енеді.
Сарапшылардың пікірінше, тарифтің көтерілетіні туралы алдын ала хабарлау — қажетті норма. Алайда байланыс сапасы жиі сұрақ туғызады, сондықтан бәсекелестікті дамыту маңызды, бұл тарифтерді сирек көтеруге мүмкіндік береді. «Жаңа ойыншылар бәсекелестік күресті күшейтуге, сапаны арттыруға, олардың құнын төмендетуге мүмкіндік береді. Екінші жағынан, қоғамда заманауи технологиялардан, сол 5G-ден қорқу бар, осы тұрғыда фобия бар, сондықтан мемлекет технологиялардың қауіп төндірмейтінін түсіндіретін құрылым ретінде әрекет ете алады», — деп атап өтті сарапшы Қалилалло Байтасов.
20 тамыздан бастап смартфондарды тексеру күшейтіледі: сатушылар құрылғыларды сатуға дейін верификациялауға міндетті. Оператормен келісімшарт жасасу абоненттің биометриялық аутентификациясынан кейін ғана мүмкін болады.