«КазМунайГаз» (КМГ) ұлттық компаниясы 2025 жылға басқарма мүшелеріне жарты миллиард теңгеден астам сыйақы төлеу туралы ақпаратқа түсініктеме берді, деп хабарлайды infohub.kz.
Бұған дейін КМГ басқарма мүшелеріне 2025 жылға 519 091 079 теңге көлемінде сыйақы төленгені белгілі болды. Басқарма құрамында төраға Асхат Хасенов және оның сегіз орынбасары – барлығы 9 адам болғандықтан, интернетте әрқайсысына шамамен 60 миллион теңгеден келетін «орташа үлес» есептеле бастады. Алайда ұлттық компания бұл қарапайым арифметиканың дұрыс еместігін түсіндіруге асықты.
Барлығы KPI-ға байланысты
КМГ-да түсіндіргендей, әрбір топ-менеджердің жалақысы жеке. Негізгі тиімділік көрсеткіштері (KPI) түпкілікті сомаға тікелей әсер етеді.
«Сыйлықақы мен бонустардың мөлшері әрбір нақты қызметкердің KPI-ға қол жеткізуіне қарай есептеледі. Дәл осындай жүйе КМГ-ның еншілес және тәуелді ұйымдарында да қолданылады», — деп атап өтті компанияда.
Бұл схеманы ұлттық компания басқармасының төрағасы Асхат Хасеновтың өзі де кулуарларда растады.
«Әр компанияның өз KPI-лары болады. Біз бұл көрсеткіштерді "КазМунайГаз" директорлар кеңесінде қорғаймыз. Тек нақты KPI-лар орындалғаннан кейін ғана орындау пайызы, бонус мөлшері және тағы басқалары анықталады», — деді Хасенов.
Оңтайландыру және қысқартулар
Миллиондаған бонустар туралы әңгімелерден бөлек, КМГ басшысы шығындарды оңтайландыру тақырыбын көтерді. Оның айтуынша, ұлттық компания Мемлекет басшысының әкімшілік шығындарды қысқарту жөніндегі тапсырмасын орындауда. Атап айтқанда, «КазМунайГаздың» орталық аппаратында 47 қызметкер қысқартылды, бұл компанияның жалпы штатының 10 пайызын құрайды.