Қазақстандық спортшылар Қытайдың Ханчжоу қаласында өтіп жатқан оқ атудан Әлем кубогының үшінші кезеңінің екі бағдарламасы бойынша финалға өте алмады. Ең жақын нәтижені 25 метрлік жылдам тапаншадан ату жаттығуында Кирилл Цуканов көрсетті, деп хабарлайды infohub.kz.
Цуканов 580 ұпай жинап, 53 қатысушы арасында 10-орынға ие болды. Ол финалистер қатарын жапқан француз Жан Кикампуамен бірдей ұпай жинағанымен, ішкі ондыққа тигізген саны бойынша – 19-ға қарсы 25 – ұтылды. Финалға сегіз спортшы шықты. Никита Чирюкин 573 ұпаймен 34-орында, ал Артемий Кабаков 569 ұпаймен 41-орында қалды. Квалификацияда үздік нәтижені неміс спортшылары Оливер Гайс пен Флориан Петер көрсетті – 584 ұпайдан, бірақ ішкі ондықтардың көптігі арқылы бірінші орын Гайске бұйырды.
Әйелдер арасындағы 10 метрлік пневматикалық тапаншадан атуда қазақстандықтардың ішінде үздік болған Валерия Попелова 565 ұпай жинап, 82 қатысушының арасында 61-орынға тұрақтады, финалдық көрсеткіштен 14 ұпайға қалды. Сауле Алимбек пен Нина Старова 558 ұпайдан көрсетіп, сәйкесінше 77-ші және 79-шы орындарға ие болды. Квалификацияда қытайлық Шэнь Ияо 588 ұпай жинап жеңімпаз атанды, ал соңғы финалист 579 ұпаймен іріктелді.
Оқ атудан Әлем кубогының үшінші кезеңі 20 шілде мен 29 шілде аралығында Ханчжоуда 61 елден 686 спортшының қатысуымен өтуде. Барлығы он жүлде жиынтығы ойнатылады. Қазақстаннан 16 спортшы бақ сынауда және бұл жарыс ұлттық құрама үшін Жапонияда өтетін 2026 жылғы Азия ойындарына дайындықтың маңызды кезеңі болмақ. Бұған дейін Германиядағы Әлем кубогының екінші кезеңінде Валерий Рахимжан 10 метрлік пневматикалық тапаншадан атуда 8-орынға, ал Арина Малиновская үш тұрыстан винтовкадан атуда сегізінші орынға ие болды.