Корей Халық Демократиялық Республикасының Сыртқы істер министрлігі меморандум дайындап, Америка Құрама Штаттарының әрекеттерінен «қорқынышты ядролық апат» болуы мүмкін деп ескертті, деп хабарлайды infohub.kz сайты.
Пхеньян АҚШ-тың ядролық күшін ұлғайтуы, сондай-ақ ядролық қару мен технологияларды тарату жөніндегі әрекеттері халықаралық ядролық тәртіпті толық күйреуге әкелді деп сенеді.
«Егер АҚШ-тың ядролық технологияларды тік және көлденең тарату жөніндегі әрекеттері әрі қарай жазасыз қалса, "Пандора жәшігі" толық ашылып, адамзатқа қорқынышты ядролық апат төнетін болады», — делінген құжатта.
КХДР Вашингтонды ядролық қарусыздану жөніндегі міндеттемелерден бас тартты, өзінің ядролық әлеуетін ұлғайтты және одақтастарына ядролық технологияларды таратты деп айыптады.
«АҚШ-тың AUKUS-қа Жапония, Оңтүстік Корея, Жаңа Зеландия және Канада сияқты одақтастарын тартып, оны атауы жағынан да, мазмұны жағынан да әлемдегі ең үлкен атом сүңгуір қайықтар альянсына айналдыруға тырысып жатқанын да назардан тыс қалдыруға болмайды», — деді елдің сыртқы саяси ведомствосы.
Пхеньянның пікірінше, АҚШ-тың Оңтүстік Кореяның атом сүңгуір қайықтарына ие болуын мақұлдауы ядролық технологиялардың «AUKUS үлгісімен» таратылғанының тағы бір дәлелі және Азия-Тынық мұхиты аймағындағы әскери-саяси жағдайға тұрақсыздықтың жаңа факторын қосады.
«АҚШ-тың ядролық күшін жедел ұлғайтуы мен ядролық технологияларды ашық тарату әрекеттерінен халықаралық ядролық тәртіп толық күйреуге ұшыраған қазіргі геосаяси жағдай біздің мемлекеттен әлемдегі бейбітшілікті қорғауда және жаһандық стратегиялық тұрақтылықты қамтамасыз етуде неғұрлым белсенді рөл атқаруды талап етеді», — деді КХДР.
Айта кетейік, жақында КХДР Қорғаныс министрлігі АҚШ пен Оңтүстік Кореяның қауіп-қатерлеріне жауап ретінде «мемлекеттік ядролық қарулы күштер мәселелері жөніндегі саясат туралы заңның бабын» іске қосуға қорқытты. Осыдан кейін КХДР-дың зымыран әскерлері жаңа типтегі қаруды сынақтан өткізді — Солтүстік Корея көшбасшысы Ким Чен Ын жаңалықты «жеңілмейтін күш» деп атады.
Ал өткен аптада КХДР АҚШ, Жапония және Оңтүстік Кореяның елді денуклеаризациялау туралы мәлімдемесін айыптап, оның ядролық мәртебесі мызғымас күйде қалатынын ескертті.