Көкшетауда бес қалалық емхана мен ескірген ғимараттардағы стационарлар көшетін алып көпбейінді аурухана қарқынды салынуда. Жоба 76%-ға дайын, деп хабарлайды infohub.kz сайты.
Жаңа медициналық кешен Қазақстандағы ең үлкен ауруханалардың біріне айналады. Мұнда ауысымына 500 пациентке дейін қабылдай алатын ірі диагностикалық орталық, күндізгі стационар, сондай-ақ 120 орындық перзентхана мен онкология бөлімшесі ашылады.
Дәрігерлер үшін 19 заманауи ота жасау бөлмесі жабдықталып, клиниканың өзі озық КТ, МРТ аппараттарымен және сәулелік терапия техникасымен қамтамасыз етіледі.
Мұнда күрделі жарақаттар, жүрек және жүйке жүйесі аурулары емделіп, инсульттан кейін оңалту жұмыстары жүргізіледі. Минут саналып жатқан шұғыл жағдайлар үшін аумақта тікұшақ алаңы қарастырылған.
Құрылыс барысын тексеруге денсаулық сақтау министрі Ақарал Алназарова келді.
«Бұл – соңғы 20 жылдағы денсаулық сақтау саласындағы ең ірі мемлекеттік-жекеменшік әріптестік жобаларының бірі. Құрылысты уақытында аяқтап қана қоймай, аурухананы заманауи жабдықтармен және білікті кадрлармен қамтамасыз ету принципті түрде маңызды. Біз жобаны барлық кезеңдерде барынша сүйемелдейтін боламыз», – деп атап өтті министр.
Болашақ аурухана үшін дәрігерлер мен медбикелерді даярлау былтыр басталған. Ашылудан кейін осы заманауи кешенге қазір ескі ғимараттарда таптайтын бес қалалық медициналық мекеме көшетіні күтілуде. Барлығы жаңа аурухана қалаға шамамен 1,5 мың жұмыс орнын береді.
Бұған дейін «Курсив» Батыс Қазақстан облысында 6,9 млрд теңгеге көпбейінді аурухана салынып жатқанын жазған.