Қазақстанның Конституциялық соты банкроттық рәсімін жүргізу және банкротты таратуды аяқтау мерзімдерін реттейтін «Оңалту және банкроттық туралы» заңның жекелеген нормаларының заңдылығын даулаған азаматтың өтінішін қарады, деп хабарлайды infohub.kz сайты.
Соттың баспасөз қызметі түсіндіргендей, өтініш беруші дауланған нормалар заңда белгіленген бес жылдық мерзім өткеннен кейін де банкроттық рәсімін жалғастыруға жол беретінін және бұл оның конституциялық құқықтарын бұзатынын алға тартқан.
«Өтініш беруші дауланған нормалар заңда белгіленген бес жылдық мерзім өткеннен кейін де банкроттық рәсімін жалғастыруға жол беріп, оның конституциялық құқықтарын бұзады деп есептеді», — делінген хабарламада.
Конституциялық сот заңның 84-бабының 1-тармағы өтініш берушінің ісінде соттармен қолданылмағанын анықтады. «Алайда азаматтың өтінішін конституциялық тексеруге жіберудің қажетті шарты — дауланған норманың сот тарапынан өтініш берушінің құқықтары мен бостандықтарына тікелей қатысты нақты істе қолданылуы. Заңның 112-бабының 1-тармағына қатысты өтініш беруші оның Конституцияға сәйкес келмейтініне жеткілікті құқықтық негіздеме келтірмеген», — деп нақтылады сотта.
Заңда белгіленген жіберу шарттары болмағандықтан, өтініш конституциялық іс жүргізуге қабылданбады.