Қостанай облысында 28 жастағы жергілікті тұрғынға қатысты үкім шықты. Ол төрт жыл бойы Binance платформасында заңсыз криптовалюта саудасымен айналысқан. Сот оны екі жылға бас бостандығынан айырып, мүлкін тәркіледі, деп хабарлайды infohub.kz.
2020 жылдан 2024 жылға дейін ер адам лицензиясыз Binance-тің P2P бөлімі арқылы криптовалюта сатып алып, сатқан. Операциялар үшін ол өз атына, туыстары мен басқа адамдарға рәсімделген банк шоттарын пайдаланған. Тапқан ақшасын банктердегі депозиттерге жасырған.
«Заңсыз табыс 1,9 млрд теңгеден асты. Ол ақшаны қылмыстық шығу тегін жасыру үшін банк депозиттеріне орналастырған», — делінген сот материалдарында.
Прокуратура талап қоюы бойынша сот сотталғаннан 1,9 млрд теңгені мемлекет кірісіне өндіріп алды. Сонымен қатар, 13,4 млн теңге қолма-қол ақша, екі жеңіл көлік және 7,9 мың доллар көлеміндегі криптовалюта тәркіленді. Оған жеті жыл бойы майнингпен және цифрлық активтермен кез келген операциялармен айналысуға тыйым салынды.
Бұған дейін Қазақстан алғаш рет мемлекеттік крипторезервті майнинг есебінен толықтыруды жоспарлап отырғаны хабарланған болатын. Ірі компанияларға он жылға бекітілген тариф бойынша электр энергиясы ұсынылады, оның орнына олар өндірілген криптовалютаның 10 пайызын мемлекетке тегін береді. Стратегиялық майнинг үшін алғашқы электр энергиясын жеткізуші Екібастұз ГРЭС-1 болады.