Қостанай облысы Ұзынкөл ауданының әкімі мен аудандық жер қатынастары бөліміне қарсы сот дауында шаруа қожалығы жеңіске жетті. Бұл туралы infohub.kz сайты хабарлайды.
Қостанай облысы соттарының ресми Telegram-арнасында хабарлағандай, Мамандандырылған ауданаралық әкімшілік сот (МАӘС) шаруа қожалығының Ұзынкөл ауданы әкімі мен аудандық жер қатынастары бөліміне қарсы талап арызын қарады. Талапкер конкурс қорытындыларын заңсыз деп тануды және күшін жоюды талап етті.
Іс материалдарынан көрінгендей, 2026 жылғы мамырда аудандық газетте шаруа немесе фермер қожалығын жүргізу және ауыл шаруашылығы өнімін өндіру үшін уақытша өтеулі жер пайдалану (жалға алу) құқығына конкурс өткізу туралы хабарландыру жарияланған. Конкурсқа бес өтінім түскен.
2026 жылғы 1 маусымда жер комиссиясы отырыс өткізіп, нәтижесінде бір өтініш беруші жеңімпаз деп танылды. Алайда шаруа қожалығы бұл шешіммен келіспей, конкурс нәтижелерін және хаттамалық шешімнен туындайтын барлық құқықтық салдарды жоюды талап етіп, сотқа жүгінді.
Сот талқылауы барысында жер комиссиясының отырысы заңда белгіленген комиссия құрамының бұзылуына байланысты арнайы кворумсыз өткені анықталды. Сонымен қатар, Жер кодексінің 43-1-бабының 14-тармағын бұза отырып, конкурс жеңімпазына негізсіз қосымша 10 балл берілген.
Сондай-ақ, комиссияның хаттамалық шешімінде даулы жер учаскесі бойынша жеңімпазды анықтауға негіз болған дәлелдер мен өлшемшарттар туралы міндетті мәліметтер жоқ екені белгілі болды. Құжатта басқа қатысушының жеңіске жетуі туралы бастапқы шешім өзгертілген қайта дауыс беру фактісі көрсетілмеген.
Анықталған барлық бұзушылықтарды ескере отырып, сот әкімшілік талапты толық көлемде қанағаттандыру туралы шешім қабылдады. Айта кету керек, шешім әлі заңды күшіне енген жоқ.