Қостанай облысының полициясы диализ орталығының қызметкерін балағаттап, дене жарақатын саламын деп қорқытқан науқастың жеке басын анықтады. Ол 70 жастағы зейнеткер болып шықты, деп хабарлайды infohub.kz.
Қостанай облыстық полиция департаментінің мәліметінше, ер адамға Қазақстан Республикасы Әкімшілік құқық бұзушылық туралы кодексінің 80-1-бабының 2-бөлігі бойынша әкімшілік хаттама толтырылды. Зейнеткерді медицина қызметкерін балағаттап, қорлағаны үшін айыптады. Жаза шарасын сот анықтайды.
Бұған дейін, 16 шілдеде, әлеуметтік желілерде Қостанайдағы «Биос» диализ орталығының филиалындағы жанжалдың бейнежазбасы пайда болды. Жазбада ер адам орталық қызметкерін балағаттап, оны «өлтіріп тастаймын» және «басын жұлып аламын» деп қорқытқан. Медицина қызметкерінің айтуынша, жанжал оның диализ процедурасына басқа ауысымда келуін өтінгеннен кейін басталған.
Бейнежазба жарияланғаннан кейін редакция мемлекеттік органдарға түсініктеме сұрап жүгінді. Полиция департаментінде ресми өтініштер түспегенін хабарлады. Қостанай облыстық денсаулық сақтау басқармасы диализ орталығы жеке медициналық ұйым болып жұмыс істейтіндіктен, араласа алмайтындарын мәлімдеді.