Қырғызстанда болашақ адвокаттардың біліктілік емтиханын бейнеге жазып, Әділет министрлігінің ресми YouTube-арнасында жариялау ұсынылды. Тиісті бұйрық жобасы қоғамдық талқылауға шығарылды, деп хабарлайды infohub.kz сайты.
Жазбаларда емтиханның қалай өткені көрінеді, алайда компьютер экрандарындағы сұрақтар мен жауап нұсқалары көрсетілмеуі тиіс.
Kaktus.Media басылымының мәліметінше, үміткер қырғыз немесе орыс тілін таңдай алады. 110 минут ішінде ол 110 сұраққа жауап беруі керек. Тапсыру үшін 110 балдың кемінде 77-сін жинау қажет.
Жеке тестті жүйе жалпы сұрақ банкісінен кездейсоқ түрде құрастырады. Тапсырмаларды қолмен іріктеуге жоба тыйым салады. Сұрақ банкісін дұрыс жауаптарымен бірге Әділет министрлігі өз сайтында жариялап, жылына кемінде бір рет жаңартып отыруды жоспарлап отыр.
Емтихандарды құжаттар келіп түскен сайын, бірақ кемінде жарты жылда бір рет өткізу ұсынылып отыр. Кандидаттарға күні мен орны туралы кемінде он күнтізбелік күн бұрын ескерту қажет.
Тестілеу техникалық ақауға байланысты үзілсе, үзіліс уақыты есепке алынбайды. Ақау жойылған соң кандидат сақталған сәттен жалғастырады. Жауаптарды қалпына келтіру мүмкін болмаса, емтихан тапсырылмады деген белгі қойылмай, басқа уақытқа ауыстырылады.
Нәтижеге он жұмыс күні ішінде шағымдануға болады. Комиссияға өтінішті қарау үшін тағы он жұмыс күні беріледі. Өту балын жинай алмағандарға қайта тапсыруға алты айдан ерте емес рұқсат етіледі.
Әділет министрлігінде ережелердің қайта қаралуын компьютерлік тестілеудің дамуымен және техникалық ақауларды тіркеу қажеттілігімен түсіндіреді. Жоба қоғамдық талқылаудан өтуі тиіс.
Бұған дейін «Курсив» Қырғызстан тарихта алғаш рет ұлттық валютасын өз бетінше шығара бастағанын жазған болатын.