Қырғызстан Шанхай ынтымақтастық ұйымы (ШЫҰ) саммиті мен Дүниежүзілік көшпенділер ойындары сияқты екі ірі халықаралық іс-шара қарсаңында қауіпсіздікті қамтамасыз ету бойынша шұғыл шаралар қабылдады, деп хабарлайды infohub.kz сайты.
NUR.KZ 24kg-ке сілтеме жасап хабарлағандай, Қырғызстан Қауіпсіздік кеңесінің хатшысы Адилет Орозбеков үйлестіру штабының отырысын өткізіп, онда осы іс-шараларды дайындау және өткізу мәселелері талқыланды. Кездесу барысында Ішкі істер министрлігі, Ұлттық қауіпсіздік мемлекеттік комитеті, Төтенше жағдайлар министрлігі, Денсаулық сақтау министрлігі және басқа да ведомстволар мен жергілікті билік өкілдері қабылданып жатқан шаралар туралы баяндады.
Саммит пен ойындар кезінде көшелер мен трассалардағы қозғалыстың уақытша шектеулері туралы халықты хабардар етуге ерекше назар аударылды. Адилет Орозбеков алдағы іс-шаралардың ауқымы, мемлекет басшыларының, шетелдік делегациялар мен қонақтардың саны жағынан ел тарихында теңдесі жоқ екенін атап өтті.
Кеңес қорытындысы бойынша мемлекеттік органдар мен жергілікті билікке терроризмге қарсы, қоғамдық және жол қауіпсіздігін қамтамасыз ету бойынша қосымша шаралар қабылдау тапсырылды. Сондай-ақ санитарлық-эпидемиологиялық бақылау күшейтіліп, төтенше жағдайлар қызметтерінің дайындығы қамтамасыз етілді.
Дүниежүзілік көшпенділер ойындары 31 тамыз бен 6 қыркүйек аралығында өтеді. Жарыстар алтыншы рет ұйымдастырылады, оған әлемнің 100-ден астам елінен 3 мыңға жуық спортшы қатысады деп күтілуде. ШЫҰ-ға мүше елдер басшыларының саммиті 30 тамыз бен 1 қыркүйек аралығында Бішкекте өтеді деп жоспарлануда. Ұйым құрамына Қазақстанды қоса алғанда 10 ел кіреді.