Қытайда Цзилинь провинциясының бұрынғы губернаторы Цзян Чаолян 746 млн юаньнан (шамамен $111 млн) астам пара алғаны үшін өлім жазасына кесілді. Мұндай үкімді Нанкин қаласының орта сатыдағы халық соты шығарды, деп хабарлайды CCTV телеарнасы.
Өлім жазасының орындалуы екі жылға кейінге шегерілді. Егер осы мерзім ішінде Цзян Чаолян жаңа құқық бұзушылық жасамаса, жаза шартты түрде мерзімінен бұрын босату құқығынсыз немесе одан әрі жеңілдетілмейтін өмір бойы бас бостандығынан айырумен ауыстырылады.
Тергеу деректері бойынша, 1995 жылдан 2025 жылға дейін Цзян Чаолян қызметтік жағдайын компаниялар мен жеке тұлғалардың мүддесіне пайдаланған. Сыйақы үшін ол келісімшарттар жасасуға көмектесіп, адамдардың қызметте жоғарылауына ықпал еткен.
Цзян Чаолян Цзилинь провинциясының губернаторы қызметін атқарған, ал 2016 жылдың қазан айынан 2020 жылдың ақпанына дейін Хубэй провинциясының партия комитетінің хатшысы болған. Бұған дейін ол Қытай ауыл шаруашылығы банкін, Қытай даму банкін және Байланыс банкін басқарған.
Бұған дейін «Курсив» Қытайда қорғаныс министрлері Вэй Фэнхэ мен Ли Шанфу өлім жазасына кесілгенін хабарлаған. Әскери сот оларды пара алу мен беруді қоса алғанда, сыбайлас жемқорлықта кінәлі деп таныды. Алдыңғы күні ҚХР-да әйгілі Шаолинь монастырінің бұрынғы настоятеліне қатысты сот аяқталды: 60 жастағы будда монахы Ши Юнсинь 24 жылға бас бостандығынан айырылды.