Қызылордада полицейлер агрессивті ер адамды ұстау үшін стандартты емес шараларды қолдануға мәжбүр болды: оның аяқтарын скотчпен байлады. Оқиға маусым айында болған, алайда видео тек қазір ғана желіге тарап, кең резонанс тудырды. Егжей-тегжейін infohub.kz сайты хабарлайды.
Қызылорда облыстық полиция департаментінің баспасөз қызметінің мәліметінше, оқиға 17 маусымда болған. Түнгі сағат 12-лер шамасында қалалық полиция басқармасының «102» арнасына Өсербаев көшесіндегі көпқабатты үйдің тұрғындарынан хабарлама түскен. Тұрғындар тыныштықты бұзып, өзін орынсыз ұстаған ер адамның агрессивті мінез-құлқына шағымданған.
Оқиға орнына келген патрульдік полиция қызметкерлері өзін орынсыз ұстауды жалғастырып, тәртіп сақшыларының заңды талаптарына бағынбаған бұзақыны анықтаған. Қоршаған ортаның қауіпсіздігін қамтамасыз ету үшін полицейлер құқық бұзушының қауіпті және агрессивті әрекеттерін тоқтату шараларын қолдануға мәжбүр болған. Атап айтқанда, олар оның аяқтарын скотчпен байлаған.
Тексеру барысында ер адамның бұрын да есірткі заттарын тұтынғаны үшін бірнеше рет жауапкершілікке тартылғаны анықталған. Оқиға орнына жедел жәрдем бригадасы шақырылған. Бұзақыға қатысты заңнамада көзделген шаралар қолданылып, мұндай әрекеттердің қайталанбауы туралы ресми ескерту жасалған.
Полиция азаматтарға еске салады: егер сіз адамның орынсыз немесе қауіпті мінез-құлқының куәсі болсаңыз, бұл туралы дереу жедел қызметтерге хабарлау қажет.