АҚШ-та Land Rover және Range Rover көліктеріндегі гибрид жүйесінің ақауына байланысты Jaguar Land Rover-ге қарсы ұжымдық талап қойылды. Талап қоюшылардың айтуынша, компания ақау туралы бірнеше жыл бойы білгеніне қарамастан, оны сатып алушылардан жасырып, тіпті ауқымды кері қайтару жариялағаннан кейін де мәселені шешпеген, деп хабарлайды infohub.kz.
Талап 2019–2024 жылдары шығарылған жұмсақ гибрид жүйесімен (MHEV) жабдықталған кроссоверлер мен жол талғамайтын көліктерге қатысты. Талап қоюшылардың пікірінше, ақауға 48 вольтты аккумулятордан 12 вольтты желіні қоректендіретін DC/DC түрлендіргішінің зақымдануы себеп болған. Оның істен шығуы электрожабдықтың дұрыс жұмыс істемеуіне, күштің жоғалуына және көліктің тоқтап қалуына әкелуі мүмкін.
2026 жылдың сәуірінде JLR АҚШ-та осы ақауға байланысты 170 мыңнан астам көлікті кері қайтарды. Дегенмен, талап қоюшылардың айтуынша, бұл мәселені шешпеген. Жүргізушілерге приборлар панелінде ескерту пайда болғаннан кейін дереу тоқтау ұсынылды, ал ақауды жоюдың түпкілікті әдісі сол кезде әлі әзірленіп жатқан болатын.
Талапқа ілінген модельдер тізіміне Range Rover, Range Rover Sport, Defender, Discovery, Discovery Sport, Range Rover Velar және Range Rover Evoque, сондай-ақ Jaguar-дың кейбір модельдері кірді.
Енді сот өндірушінің ақау туралы ақпаратты жасырғанын және автокөлік иелері алдындағы кепілдік міндеттемелерін бұзғанын анықтауы керек.
Бұған дейін Toyota-ға қатысты автоматты беріліс қорабының ақауына және Honda-ға қатысты көріністі нашарлататын ақ бояудың қабыршақтануына байланысты ұқсас ұжымдық талаптар қойылған болатын.