Либерияның Әділет министрлігі бұрынғы вице-президент Джуэл Ховард-Тейлорды есірткі саудасы, ақша жылыстату және басқа да қылмыстар үшін айыптады. Бұл — трансұлттық есірткі желісіне қатысты тергеудің бөлігі, делінген министрлік мәлімдемесінде.
2018-2024 жылдары вице-президент қызметін атқарған Ховард-Тейлор Робертс халықаралық әуежайында Либериядан шығуға әрекет жасаған кезде тоқтатылып, Либерия Ұлттық полициясының басқармасына жеткізілген. Оған бақылаудағы заттарды лицензиясыз импорттау, сату, тарату және тасымалдау, есірткі саудасы, қылмысқа шақыру, қылмысқа жәрдемдесу, қылмыстық сөз байласу және ақша жылыстату айыптары тағылады.
Ховард-Тейлор Либерияның бұрынғы президенті Чарльз Тейлормен некеде болған. Чарльз Тейлор Сьерра-Леонедегі қатыгездіктерге демеушілік жасағаны үшін халықаралық соғыс қылмыстары сотымен сотталған болатын.
Үкімет сондай-ақ желідегі рөлдері үшін үш шетелдікті сырттай айыптады: хорватиялықтар Николаи Иванчич пен Миховил Вровач және украиналық Тара Задериеко. Билік оларды тауып, ұстау үшін шаралар қолданатынын мәлімдеді.
Бұл айыптар өткен айда Либерия тарихындағы ең ірі есірткі тәркілеу — шамамен 336 миллион доллар тұратын тонналаган кокаин туралы хабарланғаннан кейін жасалып отыр. Билік бұл іске жоғары полиция шенеуніктері қатысы бар деп мәлімдеген. Екі іс бір-бірімен байланысты емес.
Соңғы жылдары Батыс Африка Оңтүстік Америкадан Еуропаға тасымалданатын кокаиннің негізгі транзиттік жолына айналды. Контрабандашылар аймақтың кейбір бөліктеріндегі әлсіз шекара бақылауы мен құқық қорғау жүйесінің кемшіліктерін пайдалануда.