Linkin Park тобы Честер Беннингтон қайтыс болғаннан кейінгі жаңа кезеңге арналған «Linkin Park: Unshatter» деректі фильмін жариялады. Музыканттар бұл хабармен бірге фильмнің алғашқы трейлерін де көрсетті, деп хабарлайды infohub.kz.
Фильмнің тұсауы 30 қыркүйекте өтеді. Режиссері — Linkin Park мүшесі Джо Хан. Картина топтың әлемдік сахнаға оралуы, From Zero альбомының жасалуы және жаңартылған құрамдағы алғашқы концерттік тур туралы баяндайды. Көрермендер сирек кездесетін архивтік кадрларды, сахна артындағы түсірілімдерді, студиялық сессияларды және топтың Сан-Паулудағы концерттерін көре алады.
Фильмде Linkin Park тарихындағы жаңа кезеңге — вокалист Эмили Армстронг пен барабаншы Колин Бриттейнге ерекше назар аударылады. Жасаушылардың айтуынша, картина тек шығармашылық процесті ғана емес, сонымен қатар музыканттардың қайғыны қалай бастан өткергенін, өздерін қайта іздегенін және концерттік қызметке қалай оралғанын көрсетеді.
Фильм премьерасынан бірнеше күн бұрын, 25 қыркүйекте, Unshatter (Live From São Paulo) концерттік альбомы шығады. Оған Linkin Park шығармашылығының әр кезеңіндегі әндердің тірі орындаулары, сондай-ақ фильмге енбейтін бірнеше эксклюзивті жазбалар кіреді.
Режиссер Джо Ханның айтуынша, Unshatter — бұл тек топ туралы ғана емес, сонымен қатар достық, төзімділік және ең ауыр сынақтардан кейін де алға жылжу қабілеті туралы әңгіме. Оның сөзінше, көптен бері жанкүйерлер бұрын ешқашан жарияланбаған кадрларды көреді, ал жаңа тыңдармандар Linkin Park жолын жақсырақ түсіне алады.