Жаңа Алатау қаласындағы Iconic Tower мұнарасының құрылыс жобасына оңтүстіккореялық Lotte Hotels & Resorts қонақ үй желісін тарту жоспарлануда. Бұл туралы Қазақстан премьер-министрі Олжас Бектеновтің төрағалығымен өткен қала кеңесінің отырысында белгілі болды, деп хабарлайды infohub.kz.
Бұған дейін Iconic Towers Алатаудағы алғашқы әрі ең биік мұнара ретінде жарияланған болатын. Қазіргі кезде биіктігі 272 метр, 80 қабатты кешеннің құрылысына тартылған жеке инвестиция көлемі $800 млн астам. Нысанды пайдалануға беру 2029 жылдың соңына жоспарланған.
Кешен ортақ үш қабатты подиумда орналасқан әртүрлі қабаттағы екі мұнарадан тұрады. 80 қабатты мұнарада халықаралық деңгейдегі бес жұлдызды қонақ үй орналасады (мүмкін, дәл осы жерде Lotte өз үлесін қосады), ал екінші 56 қабатты мұнарада А класындағы кеңселер мен пәтерлер болады. Кешеннің жалпы ауданы 276,8 мың шаршы метрді құрайды, оның 58 мың шаршы метрі мәдени кеңістіктер мен сауда-ойын-сауық орталығына бөлінеді.
Жобаның негізгі құрылысшысы және девелопмент-менеджері — қытайлық China State Construction Engineering Corporation (CSCEC). Ғимараттың дизайнын британдық Zaha Hadid Architects сәулет бюросы мен америкалық Skidmore, Owings & Merrill (SOM) компаниясы әзірледі.
Iconic Tower жобасы бойынша атқару комитетінің құрамына ҚР президентінің Alatau City жобасы бойынша бас кеңесшісі Вонг Хеан Файн, Caspian Group директорлар кеңесінің төрағасы Юрий Цхай (Forbes нұсқасы бойынша ең бай қазақстандықтар рейтингінде $100 млн байлығымен 72-орында), Alatau City Bank-тің жалғыз акционері және Kaspi.kz-тің бірлескен иесі Вячеслав Ким ($7,1 млрд байлығымен ең бай қазақстандықтар тізімінде бірінші орында), сондай-ақ CSCEC International төрағасы Гао Бо кіреді.
Lotte компаниясының аймаққа қызығушылығы Алатаудағы жобамен шектелмейді. Бұған дейін Қазақстанның Даму банкі Sensata Invest компаниясының (Тасболат Абдуллин мен Асқар Дүйсенбаевқа тиесілі) Алматыда Lotte желісінің қонақ үйін салу және іске қосу үшін қаржыландыруға өтінімін қарастырып жатқанын хабарлаған.
Lotte Hotels & Resorts — Оңтүстік Кореядағы ең ірі люкс класындағы қонақ үй желісі, 1972 жылдан бері жұмыс істейді. Компания Оңтүстік Корея, Вьетнам, Жапония, Өзбекстан, Мьянма, АҚШ және Ресейдегі қонақ үйлерді басқарады.