Қазақстанда 12 тамызда магистратурада оқуға мемлекеттік білім гранттарына конкурсқа құжат қабылдау басталды. Құжаттарды 18 тамызға дейін қоса алғанда, жоғары оқу орындарының қабылдау комиссияларына, оның ішінде виртуалды комиссияларға тапсыруға болады, деп хабарлайды infohub.kz сайты.
Кешенді тестілеуге шамамен 58 мың адам қатысты. Білім гранттарына конкурсқа белгіленген өту балын жинаған талапкерлер құжат тапсыра алады. Гранттар кешенді тестілеу нәтижелері бойынша конкурстық негізде бөлінеді.
Конкурсқа қатысу үшін жеке куәліктің көшірмесі, жоғары білім туралы диплом мен қосымшасы, кешенді тестілеу сертификаты, ал бар болса — шет тілін білуді растайтын халықаралық сертификат ұсыну қажет.
Өтініш беру кезінде талапкер бір топ білім беру бағдарламасын таңдап, үш жоғары оқу орнына дейін көрсете алады.
Магистратурада оқуға барлығы шамамен 11 мың мемлекеттік білім гранты қарастырылған.
Грант иелерінің тізімдерін 25 тамызға дейін ғылым және жоғары білім министрі Саясат Нұрбектің, министрліктің және Ұлттық тестілеу орталығының ресми сайты мен әлеуметтік желілерінде жариялау жоспарлануда.
Болашақ магистранттарды қабылдау 28 тамызға дейін аяқталады.
Бұған дейін «Курсив» Қазақстанда әкімдіктер бөлетін білім гранттарына өтінім қабылдау басталғанын жазған болатын. 2026 жылы жергілікті атқарушы органдар бакалавриат, магистратура және резидентура бағдарламалары бойынша оқуға, оның ішінде өңірлерде сұранысқа ие мамандықтар бойынша кадр даярлауға 2392 грант қарастырды.