17 жастағы қазақстандық диск лақтырушы Максим Сажнев 61,37 метр нәтижемен АҚШ-тың Юджин қаласында (Орегон штаты) өтіп жатқан жеңіл атлетикадан жастар арасындағы әлем чемпионатының финалына шықты, деп хабарлайды infohub.kz.
Бұл нәтиже спортшы үшін жеке рекорд болды: бұған дейін оның үздік көрсеткіші 60,45 метр еді. Іріктеуде көрсетілген нәтиже Қазақстанның жастар арасындағы рекорды болып табылады.
Іріктеу жарыстарында Сажневтен бес қатысушы озып кетті. Үздік нәтижені аустриялық Стефан Гайсбауер (63,11 метр) көрсетті, екінші орынды италиялық Франческо д'Анжело (62,63) иеленді, үшінші — Ямайкадан келген Джозеф Ричард Салмон (62,10). Сондай-ақ қазақстандықтан жоғары поляк Якуб Родзяк (61,58) пен украин Ярослав Листопад (61,50) орналасты.
Финалдық жарыстар 8-9 тамызға қараған түні өтеді.
Сажнев осы чемпионатта финалға шыққан Қазақстанның екінші өкілі болды. Бұған дейін сырықпен секіруші Анна Черкашина 4,10 метр нәтижемен финалда 11-орын алған болатын. Бұл пәнде алтынды чех Николь Крутилова (4,45), күмісті украин Ольга Бельченко (4,40), қоланы американдық Кайли Нейра (4,35) жеңіп алды.
Өткен түні чемпионатта тағы үш қазақстандық өнер көрсетті. Маргарита Стороженко 23.40,75 нәтижемен 5 шақырымға жүгіруде 25-орын алды, чемпионка италиялық Серена ди Фабиодан (20.57,57 — чемпионат рекорды) үш минуттай қалып қойды. Ерлер арасында сол қашықтықта 18 жастағы Егор Струков 36-орынмен (21.39,40), ал 17 жастағы Шерхан Егізбай 38-орынмен (27.31,77) мәреге жетті. Жеңісті аустралиялық Исаак Бикрофт 20 жасқа дейінгілер арасындағы әлем рекордымен (18.40,37) бағындырды.
АҚШ-тағы жеңіл атлетикадан жастар арасындағы әлем чемпионаты бүгін түнде аяқталады. Қазақстан құрамасы нормативтерді орындаған алты ер және бес әйел спортшымен ұсынылған. Бұл — Польшаның Быдгощ қаласында өткен 2008 жылғы жастар арасындағы әлем чемпионатынан кейінгі ең көп құрам (12 спортшы). Екі жыл бұрын Перу астанасы Лимада біздің спортшылар саны бесеу еді, ал 2022 жылы Колумбияның Кали қаласында өткен әлем чемпионатында төртеу болған. Қазақстан 1994 жылдан бері жастар арасындағы әлем чемпионатына жеке командамен қатысып, қатарынан 16 турнирде өнер көрсетті, бірақ әлі күнге дейін жүлделі орынға іліккен емес.