Маңғыстау облысы Бейнеу ауылында полиция қызметкерлері бірден бірнеше жол қозғалысы ережесін бұзған автокөліктер кортежін тоқтатты, деп хабарлайды infohub.kz Lada.kz-ке сілтеме жасап.
Анықталғандай, автокөліктердің бірі заңсыз жарқылдағыш шаммен жабдықталған. Екіншісінің тізгінінде көлік жүргізу құқығы жоқ жүргізуші отырған. Сонымен қатар, үш автокөліктің жолаушылары қозғалыс кезінде терезеден сыртқа шығып отырған.
Полиция хабарлады: «Заңсыз орнатылған жарқылдағыш шамы бар автокөліктің жүргізушісіне Қазақстан Республикасы Әкімшілік құқық бұзушылық туралы кодексінің 603-бабының 1-бөлігі бойынша әкімшілік хаттама толтырылды. Бұл бап арнайы жарық сигналдарын заңсыз орнату және пайдалану үшін жауапкершілік белгілейді. Сонымен қатар, тексеру барысында басқа да бұзушылықтар анықталды. Оқиғаға қатысушыларға қатысты ҚР ӘҚБтК-нің 612-бабының 1-бөлігі және 615-бабының 1-бөлігі бойынша әкімшілік шаралар қолданылды».