Илон Маск АҚШ Президенті Дональд Трампқа украиналық дрондар үшін Starlink спутниктік байланысының жұмысын шектеуді жеке ұсынған болуы мүмкін. Бұл туралы infohub.kz сайты хабарлайды.
Starlink спутниктік байланысындағы шектеулер украиналық әскерилерге өз дрондарының бір бөлігін пайдалануға кедергі келтіріп отыр. The Wall Street Journal газеті анықтағандай, SpaceX компаниясының басшысы Илон Маск бұл мәселені АҚШ Президенті Дональд Трамппен жеке талқылаған.
«Starlink спутниктік байланыс жүйесіндегі шектеулер салдарынан украиналық әскерилер өз дрондарының бір бөлігін енді қолдана алмай отыр. SpaceX басшысы Илон Маск алдымен бұған АҚШ үкіметін кінәлаған, алайда бастама оның өзінен шыққан сияқты. Бұл туралы британдық The Telegraph газеті жазған, енді мұны The Wall Street Journal (WSJ) тергеуі де растады», — делінген жарияланымда.
Басылым дерегінше, Маск шектеу енгізуді ұсынып, осы мәселе жөнінде пікірін білу үшін АҚШ Президенті Дональд Трамппен жеке байланысқа шыққан. CBS телеарнасының мәліметінше, Маскқа өз компаниясының Украинадағы соғыстан пайда көретін ұйым ретінде көрінгені ұнамайды.
Трамп әңгіме барысында Маскқа қандай жауап бергені белгісіз, алайда ол көпшілік алдында бұл жағдай туралы ештеңе білмейтінін айтқан. Украиналық дрондардың жұмысына кім кедергі келтіргені туралы сұраққа АҚШ Президенті: «Кім екенін білмеймін, бірақ анықтағым келеді», — деп жауап берді. Соғыс министрі Пит Хегсет те Пентагонның тиісті бұйрық бермегенін мәлімдеді.
Украина үшін Starlink жұмысының шектелуі үлкен мәселеге айналды. Қалыпты жағдайда байланыс терминалы дрондар жылдамдығы сағатына 160 км-ден асқанда да жұмыс істейді, алайда украиналық бөлімшелер сағатына 90 км шамасындағы жылдамдықта-ақ іркілістер байқалғанын хабарлайды. Байланыстың үзілуі қарсы әрекет ететін дрондар мен соққы беруші дрондарды пайдалануға кедергі келтіреді. Президент Владимир Зеленский бұл жағдайды АҚШ Мемлекеттік хатшысы Марко Рубиомен талқылағанын және Starlink жұмысын «қалпына келтіру» қажет екенін мәлімдеді.