2027 жылдан бастап Ресейде шетелдік жұмысшыларды бақылаудың жаңа, неғұрлым қатаң ережелері күшіне енеді. Бұл туралы Ресей Федерациясы Қауіпсіздік кеңесі төрағасының орынбасары Дмитрий Медведев «Ведомости» басылымына берген үлкен сұхбатында мәлімдеді, деп хабарлайды infohub.kz сайты.
Медведевтің айтуынша, жекелеген аумақтарда мигранттардың шоғырлануы ел азаматтарын негізді түрде алаңдатып отыр. «Ең алдымен, ірі агломерациялардағы шоғырлану азаматтарымызды әбден негізді алаңдатады. Бұл көбіне келгендердің отбасы мүшелерінің осында болуымен, олардың орыс тілін нашар білуімен, біздің нормалар мен дәстүрлерді сақтағысы келмеуімен, сондай-ақ шетелдіктердің құқыққа қайшы әрекеттерімен байланысты. Мұндай қылмыстардың кейбірі өте үлкен резонанс тудырады», — деді ол.
2027 жылдың қаңтарынан бастап заңның шетелдік жұмысшылар өзін және отбасын өңірлік коэффициентке көбейтілген ең төменгі күнкөріс деңгейінен кем емес деңгейде ұстауға міндеттейтін ережелері күшіне енеді. Егер салық органдары мигранттың табысы бар екенін растамаса немесе оның талап етілетін мөлшерге сәйкес келмейтінін анықтаса, патент немесе жұмысқа рұқсат жарамсыз деп танылады, ал шетелдіктің өзі мен оның отбасы мүшелері Ресейде болу құқығынан айырылады.
Сонымен қатар, Қауіпсіздік кеңесі төрағасының орынбасары атап өткендей, көші-қон саласындағы бақылау, оның ішінде биометриялық деректер мен геном бойынша күшейтіледі. Шетелдіктер енді 30 күн ішінде тек қауіпті жұқпалы ауруларға ғана емес, есірткі заттарын қолданғанына да медициналық куәландырудан өтуге міндетті.
Медведев сондай-ақ азаматтық туралы заңға қабылданған өзгерістерді еске салды. Бұл өзгерістер алынған азаматтықты тоқтату негіздерінің тізімін айтарлықтай кеңейтеді. «Мұндағы ұстаным айқын: жұмыс істеуге келдің — біздің әдет-ғұрыпты құрметте және ресейлік заңнаманы сақта. Дайын болмасаң — елден кет!» — деп қорытындылады ол.