Қазақстанның мемлекеттік қызметшілеріне әлеуметтік желілердегі жеке парақшаларын жүргізу ережелері еске салынды. Шенеуніктерге азаматтардың артық сұрақтары туындамас үшін сән-салтанат заттары мен қымбат демалысты көрсетпеуге кеңес берілді, деп хабарлайды infohub.kz сайты.
Шығыс Қазақстан облысы әкімдігінің түсіндіруінше, мемлекеттік органдар мен лауазымды тұлғалардың ресми парақшалары тек қызметтік ақпаратты орналастыру үшін пайдаланылуы тиіс. Мемлекеттік қызметшілердің жеке парақшаларындағы жарияланымдар да заң талаптарына қайшы келмеуі керек. Бұл ретте «жеке парақша» деген белгі шенеунікті белгіленген нормаларды сақтау міндетінен босатпайды.
Жекелеген талаптар фотосуреттерге, бейнежазбаларға және статустарға қатысты. Шенеуніктерге мыналарға тыйым салынады: мемлекеттік қызметті немесе мемлекеттік органды беделінен айыру; кәсіп туралы теріс пікір қалыптастыру; сыбайлас жемқорлыққа қарсы заңнама талаптарына қайшы келу; мүдделер қақтығысының болуы мүмкіндігін көрсету; қорлайтын, әдепсіз, арандатушылық немесе кемсітетін мәлімдемелерге жол беру; мемлекеттік қызметші мәртебесіне сай келмейтін мінез-құлық көрсету; жария етілмеген ақпаратты жариялау.
«Статустарға, әңгімелерге (Stories), фотосуреттер мен бейнежазбаларға ерекше назар аудару қажет, өйткені тіпті қысқа мерзімді жарияланым сақталып, басқа пайдаланушылар тарапынан таратылып, қоғамдық талқылау нысанына айналуы мүмкін», — деп ескертті Шығыс Қазақстан облысының әкімдігінде.
Сонымен қатар, шенеуніктер люкс заттардың заңды сатып алыну көзі болмаған жағдайда оларды көрсету қазақстандықтар тарапынан сұрақтар туғызып, беделге кері әсер етуі мүмкін екенін ескеруі керек.
Әлеуметтік желілерді бизнесті, қызметтерді немесе тауарларды жарнамалау немесе ілгерілету үшін пайдалануға жол берілмейді. Сондай-ақ қызметтік жағдайды, лауазымды, мемлекеттік рәміздерді, ресурстарды немесе беделді жеке мүдделер үшін пайдалану ретінде қабылдануы мүмкін жарияланымдарды да болдырмау керек.
«Азаматтармен, әріптестермен және мемлекеттік органдардың өкілдерімен ашық жанжалдардан, қорлаудан, қорқытудан, кемсітетін пікірлерден және интернет-пікірталастарға қатысудан бас тарту қажет», — деп қосты ведомство.
Бұған қоса, мемлекеттік қызметшілер өздерінің көпшілік алдындағы мінез-құлқы өздері өкілдік ететін мемлекеттік органмен байланыстырылуы мүмкін екенін түсінуі тиіс.
Бұған дейін «Курсив» Астанада бұрынғы Алматы әкімі Бауыржан Байбекке тиесілі болуы мүмкін қымбат сағаттар коллекциясының ұрлануы тергеліп жатқанын жазған болатын.