90%-ы қазақстандық миллионер Александр Чукреевке тиесілі RETAM жылжымайтын мүлік басқару компаниясы Өскемендегі ADK River сауда-ойын-сауық кешенін сатты. Мәміленің құны 4,2 млрд теңге болуы мүмкін, деп хабарлайды infohub.kz сайты.
Компания хабарламасында жазылғандай, 22 сәуірдегі сатып алу-сату шартына сәйкес Өскемендегі сауда-ойын-сауық кешені — ADK River сауда орталығы сатылды. Сатып алушының аты жарияланбайды: ол жеке тұлға.
RETAM компаниясы сатылған инвестициялық мүліктің құны ғимараттар мен құрылыстар үшін 3,16 млрд теңге, жер учаскесі үшін 1 млрд теңге деп бағаланғанын нақтылады. Сонымен қатар, бірінші тоқсанда компанияға ұзақ мерзімді активтерді өткізуден 4,2 млрд теңге қаражат түсті, ол, шамасы, ADK River сауда орталығын білдіреді.
Компанияның бірінші тоқсанда мүлік сатудан түскен кірісі 3,6 млрд теңгені құрады.
Айта кетейік, RETAM компаниясының 90%-ы Forbes Kazakhstan рейтингінде Қазақстанның ең бай бизнесмендері арасында 34-орында тұрған кәсіпкер Александр Чукреевке тиесілі. Басылым оның байлығын 363 млн доллар деп бағалайды. Қалған 10%-ы Чукреевтің ұлы Николайға тиесілі.
Forbes деректері бойынша, кәсіпкер ұлымен бірге алкогольсіз сусындар шығаратын және тарататын компанияларды жеке өзі және бірлесіп бақылайды. Олардың қатарында Dizzy, Riks, Ice Tea, Rix-Tea сусындарын өндірушілер, сондай-ақ Arzu Life Fitness және Asem-Ai Saryagash ауыз сулары бар.
Бұған дейін Александр Чукреевтің, Dizzy және Ice Tea сусындарын өндірушілердің тең иесі ретінде танымал, Алматыдағы ADK сауда орталығына иелік ететін RETAM компаниясынан 2025 жылдың қорытындысы бойынша шамамен 1,25 млрд теңге дивиденд алатыны хабарланған. Тағы 110,2 млн теңге оның ұлы Николай Чукреевке тиесілі болады.