Ресейде сот орындаушылары рэпер Алишер Моргенштерннен 8,2 млн рубльден астам қылмыстық айыппұлды мәжбүрлеп өндіруге кірісті. Оған шетелдік агент міндеттемелерін орындамау негіз болды, деп хабарлайды infohub.kz сайты.
NUR.KZ-тің РИА Новостиге сілтеме жасап хабарлауынша, сәуірде музыкант сырттай 7 млн рубль айыппұлға сотталған. Ол шетелдік агент міндеттемелерін орындаудан жалтарды деп айыпталған.
Басылым мәліметінше, маусымда сот айыппұл мөлшерін 8,2 млн рубльге дейін ұлғайтқан. Бұл ретте айыпталушының өндіріп алу мөлшеріне баламалы құны бар мүлкіне қамау сақталған.
Енді сот орындаушылары бұл ақшаны рэперден өндіре бастады. Құжаттарға сәйкес, 20 тамызда сот атқару парағын берген — Моргенштерн айыппұлды өз еркімен төлемеген. Нәтижесінде 1 қыркүйекте оған қатысты «негізгі жаза түрі ретіндегі қылмыстық айыппұлды» 8,2 млн рубльден астам сомаға өндіру туралы атқарушылық іс жүргізіле бастады.
Басылым Моргенштерннің 2022 жылдың көктемінде шетелдік агенттер тізіліміне енгізілгенін еске салады. Соңғы бірнеше жылда ол Ресейден тыс жерде тұрып жатыр.